2700 شہروں میں لاکھوں افراد کا احتجاج، تارکین وطن کی بیدخلی کیلئے دھاوں کے خلاف غم و غصہ
واشنگٹن ۔ 19 ؍اکتوبر( ایجنسیز ) امریکہ کے 2700 شہروں میں ’No Kings‘ مظاہرے کئے گئے۔ نو کنگ کے عنوان سے امریکہ میں بڑے پیمانے پر احتجاج کیا گیا۔صرف شکاگو میں ڈھائی لاکھ افراد نے احتجاجی مظاہرے میں شرکت کی۔امریکہ بھر میں 70 لاکھ سے زائد افراد کی جانب سے صدر ڈونالڈ ٹرمپ کے خلاف تاریخ ساز مظاہرے کیے گئے۔ میڈیا کے مطابق مظاہرین نے تارکین وطن کی بے دخلی کیلئے دھاوں اور ریاستوں میں فوج کی تعیناتی کے خلاف غم و غصے کااظہار کیا۔مظاہرین نے صدر ٹرمپ کی پالیسیوں کو آمرانہ قرار دیا اور ’ٹرمپ انتظامیہ مزید برداشت نہیں‘ کے فلگ شگاف نعرے لگائے گئے۔امریکی میڈیا کے مطابق چھاپوں اور ڈیموکریٹ ریاستوں میں فوجی تعیناتی پر شدید ردعمل سامنے آ رہا ہے۔ مظاہرین کا الزام ہے کہ ٹرمپ آمریت اور فوجی جبر کی طرف بڑھ رہے ہیں۔ ملک بھر میں مظاہروں میں تیزی، احتجاج کا دائرہ مزید وسیع ہونے کا امکان ہے۔صدر ڈونالڈ ٹرمپ کا کہنا ہے کہ وہ خود کو بادشاہ تصور نہیں کرتے جبکہ ری پبلکن رہنماؤں نے مظاہروں کو امریکہ مخالف قرار دیتے ہوئے مسترد کر دیا۔ٹرمپ نے کہا کہ ان کے اقدامات بحران میں ملک کو مستحکم کرنے کیلئے ضروری ہے ۔ انہوں نے ان پر عائد ڈکٹیٹر ہونے کے الزامات کو یکسر مسترد کردیا۔