تین ملکی کرکٹ سیریز کے سلسلے میں امریکہ کا مقابلہ پاپوانیوگنی کے ساتھ ہوگا
نیویارک۔ 15 ۔ ستمبر (سیاست ڈاٹ کام) امریکہ میں پہلے بین الاقوامی ایک روزہ میچ کے انعقاد کی تیاریاں مکمل، تین ملکی کرکٹ سیریز کے سلسلے میں امریکہ کا مقابلہ پاپانیوگنی کے ساتھ ہوگا۔ تفصیلات کے مطابق دنیا کے سب سے طاقتور ملک امریکہ میں پہلے بین الاقوامی ایک روزہ کرکٹ میچ کے انعقاد کی تیاریاں زور و شور سے جاری ہیں۔بتایا گیا ہے کہ امریکہ میں تین ملکی کرکٹ سیریز کا انعقاد کیا جا رہا جس میں امریکہ، پاپوانیوگنی اور نمیبیا کی ٹیمیں شرکت کر رہی ہیں۔اس سیریز کے سلسلے میں امریکہ اور پاپوانیوگنی کا میچ امریکہ کی سرزمین پر کھیلے جانے والا پہلا بین الاقوامی ایک روزہ کرکٹ میچ ہوگا۔ اس سیریز میں فتح حاصل کرنے والی ٹیم ورلڈکپ 2023 کے کوالی فائنگ راونڈ میں حصہ لینے کیلئے اہل ہو جائے گی۔ واضح رہے کہ ان تینوں ٹیموں میں سے نمیبیا ایک مرتبہ ورلڈکپ تک رسائی میں کامیاب رہی ہے۔ تاہم دنیا کے سب سے طاقتور ملک امریکہ کی کرکٹ ٹیم کبھی بھی کسی بڑے آئی سی سی ٹورنامنٹ میں شرکت سے محروم رہی ہے۔