واشنگٹن/نئی دہلی: جارج ٹاؤن یونیورسٹی میں ایک ہندوستانی پوسٹ ڈاکٹریٹ فیلو کو امریکی امیگریشن حکام نے حراست میں لے لیا، جس پر سوشل میڈیا پر مبینہ طور پر یہودی مخالف پوسٹس اور حماس کے معروف سینئر مشیر کے ساتھ قریبی تعلقات رکھنے کا الزام ہے ۔ پولیٹیکو کی خبر کے مطابق بدر خان سوری کو نقاب پوش ایجنٹوں نے پیر کی رات ورجینیا کے آرلنگٹن کے روزلن محلے میں اس کے گھر کے باہر سے گرفتار کر لیا۔ سوری اسٹوڈنٹ ویزا پر تعلیم حاصل کر رہا تھا اور بطور ٹیچر بھی کام کر رہا تھا۔ سوری کے وکیل نے اس کی فوری رہائی کے لیے مقدمہ دائر کیا ہے ۔ وفاقی ایجنٹوں نے اپنی شناخت محکمہ ہوم لینڈ سیکیورٹی کے طور پر ظاہر کی اور سوری کو بتایا کہ حکومت نے اس کا ویزا منسوخ کر دیا ہے ۔ ہوم لینڈ سیکیورٹی کے محکمہ کی ترجمان ٹریسیا میک لافلن نے تصدیق کی کہ سکریٹری آف اسٹیٹ مارکو روبیو نے ہفتے کے روز کہا کہ سوری کا ویزا خارجہ پالیسی کی بنا پر منسوخ کیا جانا چاہیے ۔ میک لافلن نے ایکس پر لکھا کہ سوری جارج ٹاؤن یونیورسٹی میں ایک فارین ایکسچنج کا طالب علم تھا جو حماس کے پروپیگنڈے کو فعال طور پر پھیلا رہا تھا اور سوشل میڈیا پر سماج مخالف سرگرمیوں کو فروغ دے رہا تھا۔
