نیویارک: (ایجنسیاں)امریکہ میں کورونا ریلیف اسکیموں کا ناجائز فائدہ اٹھانے میں ملوث تقریباً 500 افراد کے خلاف مقدمہ دائر کیا گیا ہے۔خبر رساں ادارے اے ایف پی کے مطابق امریکی محکمہ انصاف نے کورونا سے متعلق فراڈ سکیموں کی روک تھام کے لیے اقدامات کا آغاز کر دیا ہے۔ محکمہ انصاف نے کہا ہے کہ 474 امریکی شہریوں کے خلاف مقدمہ دائر کر لیا گیا ہے جنہوں نے دھوکے کے ذریعے 50 کروڑ 69 لاکھ ڈالر کی رقم حاصل کرنے کی کوشش کی تھی۔ کم از کم 120 افراد نے پے چیک پروٹیکشن پروگرام (پی پی پی) سے فراڈ کے ذریعے امدادی رقم وصول کرنے کی کوشش کی جو چھوٹے کاروباروں کو ریلیف دینے کے لیے شروع کیا گیا تھا۔ ریاست ٹیکساس کے ایک رہائشی نے 15 مختلف پی پی پی قرضوں کے لیے درخواست دے کر دو کروڑ 48 لاکھ ڈالر فراڈ کے تحت حاصل کرنے کی کوشش کی، جس سے وہ ایک کروڑ 73 لاکھ ڈالر وصول کرنے میں کامیاب ہو گیا۔محکمہ انصاف کے مطابق ٹیکساس کے اس رہائشی نے ایک کروڑ سے زائد کی اس رقم سے کئی گھر، جیولری اور مہنگی گاڑیاں خریدی ہیں۔امریکی اٹارنی جنرل میرک گارلینڈ کی جانب سے جاری ہونے والے بیان میں کہا گیا ہے کہ فراڈ کے خلاف آپریشن سے ان تمام افراد کو واضح پیغام پہنچایا گیا ہے جو ہنگامی صورتحال کا ناجائز فائدہ اٹھاتے ہوئے عوام کے ٹیکس سے متعارف کیے گئے وسائل چوری کرتے ہیں۔