برسلز۔ 2 اگست (ایجنسیز) امریکہ اور ناٹو یوکرین کو ہتھیار فراہم کرنے کے لیے ایک نیا طریقہ کار اختیار کر رہے ہیں جس کے تحت ناٹو ممالک کے فنڈز سے امریکی ہتھیاروں کی خریداری یا منتقلی کی ادائیگی کی جائے گی۔ غیر ملکی خبر ایجنسی کی رپورٹ کے مطابق ایک یورپی عہدیدار کا کہنا ہے کہ اس طریقہ? کار کے ذریعہ ناٹو اتحادی یوکرین کو 10 ارب ڈالر مالیت کے ہتھیار فراہم کرنے کی امید رکھتے ہیں تاہم یہ واضح نہیں کہ یہ اسلحہ کس مدت میں فراہم کیا جائے گا۔ سینئر ناٹو عہدیدار نے بھی اس اقدام کو ناٹو کی جانب سے مربوط رضاکارانہ کوشش قرار دیتے ہوئے کہا کہ اس نئے منصوبہ میں ایک ناٹو اکاؤنٹ شامل ہے جہاں اتحادی ممالک یوکرین کے لیے اسلحہ خریدنے کے لیے رقم جمع کروا سکتے ہیں، اسے ناٹو کے اعلیٰ فوجی کمانڈر کی منظوری حاصل ہو گی۔ رپورٹ کے مطابق نئے طریقہ کار کے تحت یوکرین کے لیے اسلحہ کی ایک کھیپ سے متعلق بات چیت جاری ہے۔ دوسری جانب رپورٹ میں بتایا گہا ہے کہ ناٹو ہیڈکوارٹر، وائٹ ہاؤس، پینٹاگون، اور واشنگٹن میں یوکرینی سفارت خانے نے اس خبر پر تبصرے کی درخواستوں پر تاحال کوئی جواب نہیں دیا ہے۔
