تحدیدات ختم کرنے پر صدر ٹرمپ کیساتھ بات چیت کیلئے ہم تیار ہیں : حسن روحانی
تہران ۔ 4 ڈسمبر (سیاست ڈاٹ کام) صدر ایران حسن روحانی نے کہا ہیکہ صرف اسرائیل کو خوش کرنے کیلئے امریکہ نے ہم پر اقتصادی پابندیاں عائد کی ہیں۔ ایرانی صدر حسن روحانی نے سرکاری ٹیلیویژن کے ایک پروگرام میں ایران پر عائد امریکی اقتصادی پابندیوں کو صدر ٹرمپ کی اسرائیل کی خوشنودی حاصل کرنے کی کوشش قرار دیتے ہوئے اسرائیلی وزیراعظم نتن یاہو کی پالیسیوں کو بھی کڑی تنقید کا نشانہ بنایا۔ ایرانی صدر حسن روحانی کا امریکہ سے مذاکرات کے امکان سے متعلق پوچھے گئے سوال کے جواب میںکہنا تھا کہ اگر امریکہ ایران پر عائد غیرقانونی پابندیاں ختم کردے تو ایران جوہری معاملہ پر صدر ٹرمپ سے مذاکرات کیلئے تیار ہے اور یہ مذاکرات جوہری معاہدے کے دیگر فریقین کے سربراہان کی موجودگی میں بھی ہوسکتے ہیں۔ ایرانی صدر نے مزید کہا کہ تیل اور گیس کی مصنوعات کی قیمتوں میں اضافے پر ہونے والے مظاہروں میں غیرملکی قوتوں کا ملوث ہونا خارج از امکان نہیں تاہم مؤثرحکمت عملی اور سیکوریٹی فورسیز کے بروقت ردعمل کی وجہ سے مظاہروں پر قابو پالیا گیا ہے اور مظاہرین کو بھی اندازہ ہوگیا ہیکہ یہ اضافہ ملک کیلئے کتنا ناگزیر تھا۔ واضح رہیکہ برطانیہ، فرانس، جرمنی، چین اور روس نے 2015ء میں ایران کو جوہری ہتھیاروں کی تیاری سے روکنے کیلئے ایک معاہدہ کیا تھا۔ تاہم 2018ء میں صدر ٹرمپ نے معاہدہ سے دستبردار ہوکر ایران پر سخت اقتصادی پابندیاں عائد کردی تھں جواباً ایران نے بھی یورینیم افزودگی میں اضافہ کردیا جبکہ بقیہ فریقین اب بھی معاہدے کو برقرار رکھنا چاہتے ہیں۔