واشنگٹن ۔ 6 ڈسمبر (سیاست ڈاٹ کام) امریکی وزارت خارجہ نے ایرانی میزائلوں کے اجزاء کی اْس کھیپ کی تصاویر جاری کی ہیں جس کو امریکی بحریہ نے یمن میں حوثی ملیشیا تک پہنچنے سے پہلے بحیرہ عرب میں قبضے میں لے لیا تھا۔امریکی ذمہ داران نے چہارشنبہ کو بتایا تھا کہ امریکی بحریہ کے ایک جہاز نے ایرانی گائیڈڈ میزائلوں کے اجزاء کی ایک بڑی کھیپ ضبط کر لی ہے۔ یہ کھیپ یمن میں حوثی ملیشیا کو بھیجی جا رہی تھی۔مذکورہ ذمہ داران نے اپنی شناخت ظاہر نہ کرنے کی شرط پر برطانوی خبر رساں ایجنسی کو بتایا کہ یہ پہلا موقع ہے جب یمن کیلئے بھیجے جانے والے جدید میزائل اجزاء کی اتنی بڑی کھیپ قبضے میں لی گئی ہے۔ یہ کھیپ چہارشنبہ کو رات گئے ہونے والی ایک کارروائی میں ایک چھوٹی کشتی کے اندر سے برآمد کی گئی۔ ذمہ داران نے مزید بتایا کہ کشتی کے عملے کو یمنی ساحلی پولیس کے مراکز منتقل کر دیا گیا اور میزائلوں کے اجزاء اس وقت امریکہ کے قبضے میں ہیں۔ایران کے امور سے متعلق امریکہ کے خصوصی نمائندے برائن ہک نے جمعرات کے روز اعلان کیا تھا کہ ان کے ملک نے ایران کا ایک بحری جہاز پکڑا ہے جو بحری جہاز شکن میزائلوں کی کھیپ لے کر یمن کی جانب جا رہا تھا۔ واشنگٹن میں امریکی وزارت خارجہ کے صدر دفتر میں ایک پریس کانفرنس میں برائن نے بتایا کہ ضبط کی جانے والی کھیپ زیادہ جدید میزائلوں پر مشتمل ہے۔
