واشنگٹن : امریکی وزیر خارجہ انٹونی بلنکن کا کہنا ہیکہ پاکستان کو طالبان کی حکومت کو تب تک تسلیم نہیں کرنا چاہیے جب تک کہ وہ بین الاقوامی شرائط پر پورا نہیں اترتے۔امریکی کانگریس کی کمیٹی برائے امور خارجہ کی سماعت کے دوران بلنکن کا کہنا تھا کہ امریکہ آئندہ ہفتوں میں پاکستان کے ساتھ اپنے تعلقات کا جائزہ لے گا اور یہ دیکھے گا کہ واشنگٹن پاکستان سے افغانستان کے مستقبل کے حوالے سے کس کردار کا متمنی ہے۔بلنکن نے کہا کہ پاکستان کے افغانستان کے حوالے سے مختلف مفادات ہیں اور ان میں سے کچھ ہمارے مفادات سے متضاد ہیں۔ جیسے کہ طالبان ممبران کو پناہ دینا اور افغانستان کے مستقبل کے حوالے سے اپنے مفادات کو ترجیح دینا۔
اس سماعت کے دوران بلنکن کو امریکی اراکین کانگریس کی جانب سے پاکستان کے حوالے سے کڑے سوالات کا سامنا کرنا پڑا اور انہوں نے مطالبہ کیا کہ امریکہ پاکستان کے حوالے سے سخت پالیسی اپنائے۔
