اسلام آباد: امریکی محکمہ خارجہ نے کہا ہے کہ F-16 پروگرام وسیع تر امریکہ پاکستان دو طرفہ تعلقات کا ایک اہم حصہ ہے جبکہ امریکی سینیٹ نے بھی اسلام آباد کے ساتھ 45 کروڑ ڈالر کے مجوزہ معاہدے پر اعتراض نہیں کیا۔محکمہ خارجہ کے ایک عہدیدار نے بتایا کہ ‘مجوزہ فروخت پاکستان کی اپنے F-16 بیڑے کو برقرار رکھتے ہوئے دہشت گردی کے موجودہ اور مستقبل کے خطرات سے نمٹنے کی صلاحیت کو برقرار رکھے گی۔’امریکی افسرنے مزید کہا کہ مجوزہ فروخت اس بات کو بھی یقینی بنائے گی کہ پاکستان دہشت گردی کے خلاف جاری کوششوں اور مستقبل کی ہنگامی کارروائیوں کی تیاری میں امریکہ اور شراکت دار افواج کے ساتھ باہمی تعاون کو برقرار رکھے گا۔ایک روز قبل بین الاقوامی میڈیا نے رپورٹ کیا کہ امریکہ پاکستان کو 45 کروڑ ڈالر کا F-16سسٹینمنٹ پیکج فراہم کرنے کیلئے تیار ہے کیونکہ ‘ 30 روز کی لازمی نوٹس مدت کے دوران سینیٹ کی جانب سے معاہدہ پر کوئی اعتراض نہیں کیا گیا‘۔
