واشنگٹن : امریکہ ساڑھے تین برس کے وقفے کے بعد پھر سے اقوام متحدہ کی انسانی حقوق کونسل کا رکن بن گیا ہے۔ عالمی ادارے کی جنرل اسمبلی نے جمعرات کو 18 نئے ارکان کا انتخاب کیا۔ امریکہ کے علاوہ ارجنٹائن، بینین، کیمرون، اریٹریا، فن لینڈ، گیمبیا، ہنڈوراس، ہندوستان، قزاقستان، لتھؤنیا، لکسمبرگ، ملائیشیا، مونٹینیگرو، پیراگوائے، قطر، صومالیہ اور متحدہ عرب امارات بھی ہیومن رائٹس کونسل کے ارکان منتخب ہوئے۔ کونسل کے منتخب ارکان کی تین سالہ مدت آئندہ برس جنوری میں شروع ہو گی۔ امریکہ نے سابق صدر ڈونالڈ ٹرمپ کے دور میں اسرائیل پر تنقید کے تناظر میں اس کونسل سے علیحدگی اختیار کر لی تھی۔
