انقرہ: کرد باغیوں کی جانب سے اپنے اہلکاروں کے قتل کی مشروط مذمت کرنے پر ترکی کے دفتر خارجہ نے امریکہ کے سفیر کو طلب کرلیا۔غیر ملکی خبر رساں ادارے کے مطابق گزشتہ روز عراق میں ترک اہلکاروں کے قتل کے بعد ترکی نے یہ موقف اختیار کیا تھا کہ ترک اہل کاروں کے اغوا اور قتل میں کرد باغی تنظیم کردستان ورکرز پارٹی(پی کے کے) ملوث ہے تاہم امریکہ نے اس واقعہ کی مشروط مذمت کی ہے۔امریکی بیان میں کہا گیا تھا کہ اگر اس بات کی تصدیق ہوجاتی ہے کہ ترک شہریوں کو مبینہ طور پردہشت گرد تنظیم پی کے کے ہی نے قتل کیا ہے تو ہم اس اقدام کی شدید ترین مذمت کرتے ہیں۔ امریکہ کی جانب سے یہ بیان جاری ہونے پر ترک صدر طیب اردغان نے سخت ردعمل ظاہر کرتے ہوئے اسے دہشت گردوں کی طرفداری کے مترادف قرار دیا۔ انہوں نے کہا کہ اس وقعہ پر امریکہ کا بیان مسخرہ پن ہے۔