واشنگٹن 5دسمبر (سیاست ڈاٹ کام) ایران کے تسلط کو کم کرنے کے لئے ، امریکہ مغربی ایشیاء میں 14000 اضافی فوج بھیجنے پر غور کررہا ہے ۔ فوجیوں کے علاوہ درجنوں جہاز اور دیگر فوجی سازوسامان بھی بھیجے جائیں گے ۔روزنامہ وال اسٹریٹ جرنل نے امریکی حکام کے حوالے سے بتایا ہے کہ امریکی صدر ڈونالڈ ٹرمپ جلد ہی اس سلسلے میں کوئی فیصلہ لے سکتے ہیں۔ اس فیصلے سے وہاں موجود امریکی فوجیوں کی تعداد دوگنی ہوجائے گی۔واضح رہے کہ گذشتہ سال مئی میں ، امریکی صدر ڈونالڈ ٹرمپ نے ایران نیوکلیئر معاہدے سے امریکہ کو الگ کرنے کا اعلان کیا تھا۔ تب سے ، دونوں ممالک کے مابین تعلقات بہت تلخ ہوگئے ہیں۔ اس نیوکلیئر معاہدے کی دفعات پر عمل درآمد کے بارے میں بھی شکوک و شبہات ہیں۔ امریکہ نے ایران پر طرح طرح کی پابندیاں بھی عائد کردی ہیں۔قابل ذکر ہے کہ سال 2015 میں ایران نے امریکہ ، چین ، روس ، جرمنی ، فرانس اور برطانیہ کے ساتھ معاہدے پر دستخط کئے تھے ۔ اس معاہدے کے تحت ایران نے اس پر عائد اقتصادی پابندیوں کے خاتمے کے بدلے میں اپنے نیوکلیئر پروگرام کو محدود کرنے پر اتفاق کیا تھا۔
