واشنگٹن : امریکہ کی جانب سے پاکستان اور ہندوستان کے درمیان تعلقات میں پیشرفت کا خیر مقدم کیا گیا ہے۔ترجمان وائٹ ہاؤس جین ساکی نے اپنے ایک بیان میں کہا ہے کہ لائن آف کنٹرول (ایل او سی) پر جنگ بندی جنوبی ایشیا میں امن اور استحکام کے لیے مثبت پیشرفت ہے۔جین ساکی کا کہنا تھا کہ جنوبی ایشیا میں وسیع تر امن اور استحکام ہم سب کے مفاد میں ہے۔ترجمان وائٹ ہاؤس کا مزید کہنا تھا کہ ہم دونوں ملکوں کی حوصلہ افزائی کرتے ہیں کہ وہ اس پیشرفت کو مزید آگے بڑھائیں۔خیال رہے کہ پاکستان اور ہندوستان کے درمیان حالیہ تناؤ دو سال قبل پلوامہ واقعے کے بعد پیدا ہوا، ہندوستان نے 26 فروری 2019 کو پلوامہ واقعے کی آڑ میں بالاکوٹ پر حملہ کیا جبکہ پاکستان نے ہندوستانی جارحیت کا جواب 27 فروری کو دیتے ہوئے ہندوستانی فضائیہ کے دو طیارے مار گرائے تھے اور ہندوستانی ونگ کمانڈر ابھی نندن کو حراست میں لے لیا تھا۔گزشتہ روز پاکستان اور ہندوستان کے ڈی جی ملٹری آپریشنز کے درمیان ہاٹ لائن پر رابطہ ہوا تھا جسے عالمی سطح پر بھی سراہا جا رہا ہے۔