تہران، 16 جنوری (سیاست ڈاٹ کام) ایران نے یوکرین کے طیارہ پر میزائل داغنے کے واقعہ کو انسانی غلطی قرار دیا ہے اور کہا ہے کہ ہو سکتا ہے کہ امریکہ کی تکنیکی مداخلت سے یہ غلطی ہوئی ہو۔ ’تہران ٹائمز ڈیلی‘ کی رپورٹ کے مطابق ایران کی مسلح افواج کے ڈپٹی کمانڈر علی عبداللہ ہی نے چہارشنبہ کو یہ باتیں کہیں۔ انہوں نے کہا کہ اس طرح کے امکانات کی جانچ پڑتال کرنے کے لئے ایک ٹیم قائم کی گئی ہے ۔قابل ذکر ہے کہ یوکرین کا مسافر بردار طیارہ 8جنوری کو ایران کے دارالحکومت تہران میں حادثہ کا شکار ہو گیا تھا، جس سے طیارے میں سوار 176 مسافروں کی موت ہو گئی تھی۔
اس واقعہ کے بعد ایران کی مسلح افواج نے اعلان کیا تھا کہ یہ حادثہ انسانی غلطی کی وجہ سے داغے گئے کروز میزائل کی وجہ سے ہوا۔مسٹر عبداللہ ھي نے کہا کہ یہ واقعہ ایک انسانی غلطی ہے کیونکہ جہاز پر میزائل داغنے والے کو کمان سینٹر سے پیغام موصول ہونے میں مشکل ہوئی تھی۔
