واشنگٹن۔29 اپریل ۔( سیاست ڈاٹ کام ) امریکہ نے شام میں حالیہ دہشت گردانہ حملوں کی سخت مذمت کرتے ہوئے ملک میں ہر طرف سے جنگ بندی نافذ کرنے کی اپیل کی ہے ۔امریکی وزارت خارجہ کی ترجمان مورگن اورٹاگس نے ایک بیان جاری کرکے یہ اطلاع دی۔ ترجمان نے کہا کہ امریکہ شام میں ہر طرف سے جنگ بندی لاگو کرنے کی اپیل کرتا ہے ۔ شام کے شمالی شہر عفرین میں منگل کو ایک تیل ٹینکر میں ہونے والے دھماکے میں 11 بچوں سمیت 40 افراد ہلاک ہوئے تھے ۔ اس دھماکے میں مارے جانے والوں میں چھ ترک حمایت یافتہ جنگجو بھی تھے۔شام میں ترکی اپنے اتحادی شامی باغیوں کیساتھ مل کر پی کے کے سے متعلق کرد جنگجوؤں کیخلاف جنگ لڑ رہا ہے۔اس کے تحت ترکی نے شام میں کئی مہم بھی چلا رکھی ہے ۔
