تہران۔ 18 اکتوبر (یو این آئی) ایرانی میڈیا کے مطابق ایرانی نائب صدر محمد رضا عارف نے کہا کہ ہم امریکہ کے ساتھ مذاکرات کر رہے تھے لیکن اس نے مذاکرات کے دوران ہم پر حملہ کردیا۔ محمد رضا عارف نے کہا کہ ایرانی قوم یہ برداشت نہیں کرے گی کہ ہم امریکی ناجائز خواہشات کو دباؤ میں آکر تسلیم کرلیں۔ انہوں نے کہا کہ ہم کسی کے ساتھ بھی مذاکرات کرسکتے ہیں لیکن صیہونی حکومت کے ساتھ کوئی مذاکرات نہیں ہوں گے ۔ محمد رضا عارف نے واضح کی کہ امریکہ ایران سے مطالبہ کرتا ہے کہ وہ مذاکرات پر آنے سے قبل ہی شرائط مان لے ، ہم یہ طریقہ قبول نہیں کریں گے ۔ انہوں نے مزید کہا کہ ایک طرف امریکہ انسانی حقوق کے پاسدار ہونے کا ڈھونگ رچاتا ہے دوسری جانب سے ہم پر فوجی کارروائی کرکے ہمیں مذاکرات میں سرِ تسلیم خم کرکے جھک جانے کو کہتا ہے ، ایرانی قوم نہیں جھکے گی۔
