واشنگٹن ۔ 11 اگست (ایجنسیز) امریکہ کی مختلف ریاستوں میں شدید بارش کے سبب سیلابی صورتحال پیدا ہو گئی ہے۔ خبر ایجنسی کے مطابق امریکی ریاست وسکونسن میں شدید بارش کے باعث سیلابی صورتحال ہے، وسکونسن میں سڑکوں پرپانی جمع ہو گیا ہے، گاڑیاں ڈوب گئی ہیں اور ہزاروں گھر بجلی سے محروم ہیں۔ خبر ایجنسی کے مطابق امریکی نیشنل ویدر سروس نے کنساس، آئیووا، نیبراسکا، مسوری، الینوائے اور وسکونسن کے لیے الرٹ جاری کر دیا ہے۔ دوسری جانب میکسیکو سٹی میں بھی شدید بارش کے باعث سیلابی صورتحال ہے، میکسیکو سٹی میں خراب موسم کے باعث حدِ نگاہ متاثر ہوئی ہے۔ خبر ایجنسی کے مطابق بینیٹو جواریز ایئر پورٹ پر فلائٹ آپریشن 3 گھنٹوں کے لیے معطل رہا۔ امریکی نیشنل ویدر سروس کا بتانا ہے کہ ہفتہ سے شروع ہونے والی بارش پیر تک جاری رہ سکتی ہے۔
