نئی دہلی : امریکی بحری جہاز ہندوستان کے خصوصی اقتصادی زون میں گشت پر نکلا اور اجازت طلب کیے بغیر اس حدود میں داخل ہونے پر ہندوستان نے اعتراض کرتے ہوئے امریکہ سے احتجاج کیا ہے۔ہندوستان کی وزارت خارجہ کے ترجمان نے اپنے بیان میں کہا کہ ہم نے اپنے خصوصی اقتصادی زون سے امریکی بحری جہاز کے گزرنے کے حوالے سے سفارتی ذرائع کے ذریعے امریکی حکومت کو اپنے تحفظات سے آگاہ کردیا ہے۔امریکی کے 7 ویں بیڑے نے اس سے قبل اپنے بیان میں کہا تھا کہ یو ایس ایس جان پال جونز نے چہار شنبہ کو عالمی قوانین کے تحت ہندوستان کی جانب سے منظوری لیے بغیر لکشادپ جزیرے سے تقریباً 130 ناٹیکل مائلز میں اپنے حقوق اور آزادی کا استعمال کیا۔انہوں نے کہا کہ خصوصی اقتصادی زون میں داخلے سے قبل اجازت طلب کرنے کا ہندوستان کا مطالبہ بین الاقوامی قانون سے مطابقت نہیں رکھتا اور جہاں بھی بین الاقوامی قانون اجازت دیتا ہے، امریکہ اس سمت میں سمندر میں بھی جائے گا، پرواز بھی کرے گا اور کام بھی کرے گا۔دوسری جانب ہندوستانی ترجمان نے کہا کہ بحری جہاز کی مسلسل نگرانی کی گئی جس کے بعد وہ خلیج فارس سے آبنائے ملاکا کی طرف چلا گیا۔انہوں نے ایک بیان میں کہا کہ ہندوستان کا خیال ہے کہ اقوام متحدہ کے بحری قانون سے متعلق کنونشن ممالک کو یہ اجازت نہیں دیتا ہے کہ وہ دوسری ریاستوں کے خصوصی اقتصادی زونز اور براعظموں میں فوجی مشقوں خصوصاً اسلحے یا دھماکہ خیز مواد کے استعمال کی اجازت نہیں دیتا۔