تہران۔ 23 مارچ ۔(سیاست ڈاٹ کام) ایران کے سپریم لیڈر آیت اللہ علی خامنہ ای نے کہا ہے کہ امریکی دباؤ کے باوجود ایران اپنی دفاعی صلاحیتوں میں اضافہ کرے گا۔ انہوں نے کہا کہ ایرانی عسکری قوت کو اس سطح پر ہونا چاہیے کہ دشمن اسے خوف زدہ نہ کر سکے۔ واضح رہے کہ ایرانی میزائل پروگرام کے حوالے سے تہران حکومت عالمی دباؤ کا شکار ہے، جب کہ گزشتہ برس مئی میں امریکی صدر ڈونالڈ ٹرمپ نے ایران اور عالمی طاقتوں کے درمیان طے پانے والے جوہری معاہدے سے نکلتے ہوئے ایران کے خلاف سخت ترین پابندیوں کے نفاذ کا اعلان کیا تھا۔ امریکی پابندیوں کو مقصد ایرانی کو جوہری سرگرمیوں سے باز رکھنے کے علاوہ اس کے میزائل پروگرام کو سست تر بنانا بھی ہے۔ ایران کا نیوکلیر پروگرام روزِ اول سے تنازعہ کا شکار رہا ہے۔ امریکہ اور مغربی طاقتوں کا دعویٰ ہے کہ تہران جارحانہ مقاصد کیلئے نیوکلیر اسلحہ کیلئے کوشاں ہے جبکہ ایرانی حکومت کا کہنا ہے کہ نیوکلیر سرگرمی حصول توانائی اور پُرامن استعمال کیلئے ہے۔
