واشنگٹن : امریکہ میں کاروبار حکومت کے جزوی طور پر مفلوج ہونے کا خطرہ بڑھتا جا رہا ہے۔ ریپبلکن ارکان نے سینیٹ میں اس بل کی منظوری کا راستہ روک لیا جس کا مقصد موجودہ مالی سال کے خاتمے سے قبل ہی حکومت کے لیے مزید فنڈز حاصل کرنا تھا۔ امریکہ میں نیا مالی سال یکم اکتوبر سے شروع ہونا ہے۔
اگر اس وقت تک بجٹ سے متعلق معاملات طے نہیں پاتے تو حکومتی معاملات مفلوج ہو جائیں گے جس کے لیے امریکہ میں ’شٹ ڈاؤن‘ کی اصطلاح استعمال ہوتی ہے۔ اس کا مطلب ہے کہ بہت سے ریاستی ملازمین کو جبری چھٹی پر بھیج دیا جائے گا یا انہیں بغیر تنخواہ کے کام کرنا ہو گا۔ صدر جو بائیڈن کی انتظامیہ اس صورتحال سے بچنے کے لیے پر امید ہے۔
