تل ابیب: اسرائیل نے واضح کیا ہے کہ حماس کے 25 فیصد اصل جنگجو رفح میں ہیں، امریکہ کی مخالفت کے باوجود رفح پر کنٹرول حاصل کریں گے۔ اسرائیل کے اسٹریٹجک امور کے وزیر رون ڈرمر نے ایک انٹرویو میں کہا ہے کہ رفح کے حوالے سے امریکی فریق کے خیالات سنیں گے لیکن مصر کی سرحد پر واقع شہر رفح کو کنٹرول کیا جائے گا چاہے دونوں اتحادی کسی معاہدہ پر پہنچیں یا نہیں، یہ ہر صورت ہو گا چاہے اسرائیل کو تنہا لڑنا پڑے، اگر امریکہ سمیت پوری دنیا اسرائیل کیخلاف ہو جائے ہم پھر بھی جنگ جیتنے تک لڑیں گے۔ انہوں نے کہا کہ حماس کو غزہ میں چھوڑنا پورے خطہ سے اسرائیل پر لامتناہی حملوں کا باعث بنے گا یہی وجہ ہے کہ ان کو ہٹانے کا عزم اتنا مضبوط ہے چاہے اس سے امریکہ کے ساتھ ممکنہ اختلافات پیدا ہوجائیں پھر بھی حماس کیخلاف کارروائی جاری رکھی جائے گی۔ اسرائیلی وزیر نے کہا کہ رفح میں حماس کے 4 بریگیڈز برقرار ہیں جن کی حمایت غزہ کے دوسرے حصوں سے انخلا کرنے والے جنگجو کر رہے ہیں، حماس کی یہ طاقت جنگ سے پہلے کی طاقت کے 25 فیصد ہے، ہم ایک چوتھائی طاقت کو ایک جگہ پر نہیں چھوڑیں گے۔
