واشنگٹن: 28 جنوری (یو این آئی) امریکہ کی ڈیموکریٹک مسلم رکن کانگریس الہان عمر پرخطاب کے دوران ایک شخص نے کوئی بدبودار مائع چیز پھینک دی۔ مسلم رکن کانگریس کو امریکہ کی ریاست منی سوٹا کے شہر میناپولیس میں ٹاون ہال میٹنگ سے خطاب کے دوران نشانہ بنایا گیا۔ امریکی رکن کانگریس مطالبہ کررہی تھی کہ ہوم لینڈ سکیورٹی کی وزیر کرسٹی نوم استعفی دیں یامواخذہ کا سامنا کریں۔ مائع مواد پھینکے جانے سے الہان عمر زخمی نہیں ہوئیں جبکہ سکیورٹی پر مامور اہلکار نے سفید فام ملزم کو حراست میں لے لیا۔ امریکی رکن کانگریس الہان عمر کو صدرٹرمپ اکثر تنقید کا نشانہ بناتے رہے ہیں۔ الہان عمر کے والدین کا تعلق صومالیہ سے ہے جبکہ کرسٹی نوئم کو منی سوٹا میں آئس اہلکار کے ہاتھوں ہلاکت پر تنقید کا سامنا ہے ۔ امریکی میڈیا کے مطابق ہوم لینڈ سکیورٹی کی وزیر کرسٹی نوم اور صدر ٹرمپ کے مشیر اسٹیفن ملر پر گمراہ کن معلومات پھیلانے کاالزام ہے کہ اہلکاروں نے مظاہرہ کرنے والے ایسے مسلح شخص کو ہلاک کیا جو قتل عام کرنا چاہتا تھا جبکہ الیکس پریٹی کے ہاتھ میں گن نہیں تھی اور اسے گولی مارے جانے سے پہلے ہی غیر مسلح کیا جا چکا تھا۔
