نئی دہلی ۔ 22 نومبر (ایجنسیز) امریکی کانگریس کی جانب سے ہند۔ پاکجنگ سے متعلق جاری کی گئی رپورٹ پر ہندوستانی اپوزیشن کے رہنما جے رام رمیش نے نریندر مودی پر سخت تنقید کی ہے۔ جیرام رمیش نے اپنے بیان میں کہا ہے کہ امریکی کانگریس رپورٹ جنگی میدان میں پاکستان کی ہندوستان پر فتح کی بات کرتی ہے، ہندوستانی شکست پر مودی کو اپنی مجرمانہ خاموشی توڑنی چاہیے۔ اِن کا مزید کہنا تھا کہ امریکی کانگریس کی رپورٹ نے ہمارے سفارتی وفد کی اہلیت پر بھی سوالات اٹھا دیے ہیں، یہ سفارتی محاذ پر ہندوستان کے لیے ایک اور سیٹ بیک ہے۔ واضح رہے کہ امریکی کانگریس کی جانب سے جاری کردہ رپورٹ میں کہا گیا ہے کہ مئی میں پاک ہندوستان جنگ میں پاکستان نے ہندوستان پر فوجی برتری حاصل کی، چار روزہ لڑائی کے دوران چین کے ہتھیاروں کے ساتھ پاکستان کی کارکردگی نمایاں رہی۔ رپورٹ کے مطابق پہلی بار چین کے جدید ہتھیار HQ-9 میزائل ڈیفنس سسٹم،PL-15 میزائل اور J-10 لڑاکا طیارے براہِ راست جنگ میں استعمال ہوئے۔ چین نے جون 2025ء میں پاکستان کو J-35 جدید لڑاکا طیارے، KJ-500 ایئرکرافٹ اور بیلسٹک میزائل ڈیفنس سسٹمز فروخت کرنے کی منظوری دی تھی۔
