دوحہ۔ 20 فبروری (سیاست ڈاٹ کام) افغان طالبان کے دفتری ترجمان سہیل شاہین نے ایک بیان میں کہا ہیکہ امن مذاکرات کے تحت پہلے طالبان اور امریکی افواج کے مابین پرتشدد کارروائیاں باقاعدہ طور پر بند کی جائیں گی اور جس ماہ یہ اعلامیہ جاری ہوگا، اسی مہینے کے اختتام تک امن معاہدہ پر دستخط بھی کر دیئے جائیں گے۔ ان کا کہنا تھا کہ امریکہ اور طالبان میں جنگ بندی سے متعلق اعلامیہ میں امن معاہدہ پر دستخط کی تاریخ بھی تحریر کی جائے گی۔ طالبان ذرائع کے مطابق، یہ اعلامیہ آج یا کل جاری ہو سکتا ہے جبکہ فریقین کی جانب سے پرتشدد کارروائیاں روکنے کی ممکنہ تاریخ 22 فروری ہوگی۔ امید ہے کہ فروری کے اختتام یا پھر مارچ کی پہلی تاریخ تک امن معاہدے پر باضابطہ دستخط کردیئے جائیں گے۔
