ملبورن ۔31 ڈسمبر (سیاست ڈاٹ کام)کرکٹ سمیت کھیلوں کی دنیا میں آئے دن دلچسپ واقعات پیش آتے رہتے ہیں جو شائقین کو عرصے تک یاد رہتے ہیں اور ایسا ہی ایک دلچسپ امپائرنگ کا واقعہ آسٹریلین ٹی20 لیگ بگ بیش میں پیش آیا۔ایڈیلیڈ اسٹرائیکرز اور میلبورن رینیگیڈز کے درمیان کھیلے گئے میچ میں ایک فیصلے نے اسٹیڈیم اور ٹی وی پر بیٹھے شائقین کو ہنسنے پر مجبور کردیا۔ ایڈیلیڈ اسٹرائیکرز کے راشد خان نے میلبورن رینیگیڈز کے بیو ویبسٹر کے خلاف ایل بی ڈبلیو کی اپیل کی اور اس موقع پر گریگ ڈیوڈسن نے آؤٹ کے لیے انگلی اٹھادی جس پر راشد خان نے جشن منانا شروع کردیا۔ تاہم اسی لمحے امپائر اپنی انگلی آؤٹ کے لیے بلند کرتے ہوئے اچانک ناک کی جانب لے گئے اور ناک کھجانے لگ گئے جس پر گراؤنڈ میں موجود کھلاڑی اور 20 ہزار سے زائد تماشائی تذبذب کا شکار ہو گئے۔ امپائر نے ویبسٹر کو ناٹ آؤٹ قرار دیا لیکن ری پلے سے واضح تھا کہ راشد خان کی گیند وکٹوں کو ٹکرا رہی تھی اور یہی وجہ تھی کہ ڈیوڈسن نے اپین غلطی بھی تسلیم کر لی۔ ڈیوڈسن نے کہا کہ میچ کے ماحول میں وہ غلطی کر بیٹھے، پہلے مجھے لگا آؤٹ ہے لیکن پھر یکدم میں نے اپنا فیصلہ تبدیل کرتے ہوئے ناٹ آؤٹ قرار دینے کا فیصلہ کیا۔ تاہم یہ فیصلہ بھی میچ کے نتیجے پر اثرانداز نہ ہو سکا اور رینیگیڈز کو میچ میں 18رنز سے شکست کا سامنا کرنا پڑا تاہم ویبسٹر ناقابل شکست 36 رنز کی اننگز کھیلنے میں کامیاب رہے۔
