ممبئی: بالی ووڈ کے لجنڈری اداکار اور معروف میزبان امیتابھ بچن نے اپنے پسندیدہ اداکار کا نام بتایا مگر حیران کن طور پر وہ عامر خان، سلمان خان، شاہ رخ خان نہیں ہیں۔ کون بنے گا کروڑ پتی 16 کی ایک قسط کے دوران امیتابھ بچن نے پشپا 2 کے اداکار الو ارجن کی صلاحیتوں کا اعتراف کرتے ہوئے انہیں اپنا پسندیدہ اداکار قرار دیا۔ انہوں نے تقابل کرنے پر کہا کہ میرا الو اجن سے موازنہ بنتا ہی نہیں کیونکہ وہ بہت اچھا اداکار ہے اور شاندار کام کررہا ہے۔ امیتابھ بچن نے حاضرین و ناظرین پر زور دیا کہ وہ ارجن کی پشپا 2 فلم ضرور دیکھیں پھر معلوم ہوجائے گا کہ وہ کتنا زبردست اداکار ہے۔ اس بات کا تذکرہ اُس وقت نکلا جب پروگرام میں گرہست خاتون نے شرکت کی اور بتایا کہ وہ ارجن اور امیتابھ کی مداح ہے۔ امیتابھ نے ہنستے ہوئے کہا کہ ارجن کے ساتھ میرا نام شامل کرنے سے اب کوئی فرق نہیں پڑے گا، وہ ناقابل یقین حد تک باصلاحیت فنکار ہے اور انہیں جو پذیرائی ملی وہ اسی کے لائق ہیں۔ بگ بی نے کہا کہ میں خود ارجن کا بڑا مداح ہوں اور اُن کی حالیہ فلم پشپا 2 دیکھی ہے۔
