سری نگر، 26 جون (سیاست ڈاٹ کام) مرکزی وزیر داخلہ امیت شاہ وادی کشمیر کے دو روزہ دورے پر آج سری نگر پہنچے ۔ یہ ان کا مرکزی وزیر داخلہ کے عہدے کا چارج سنبھالنے کے بعد پہلا دورہ کشمیر ہے ۔ امیت شاہ اپنے دو روزہ دورے کے دوران سری نگر میں ایک اعلیٰ سطحی سیکورٹی اجلاس میں ریاست کی مجموعی سیکورٹی صورتحال بالخصوص یکم جولائی سے شروع ہونے والی سالانہ امرناتھ یاترا کے سلسلے میں کئے گئے انتظامات کا جائزہ لیں گے ۔ اس کے علاوہ جنوبی کشمیر میں سطح سمندر سے 13 ہزار 500 فٹ بلندی پر واقع امرناتھ گھپا میں حاضری دیں گے ۔ وہ سری نگر میں مختلف وفود سے ملنے کے علاوہ بی جے پی کور گروپ کے اجلاس کی بھی صدارت کریں گے ۔ امیت شاہ ریاستی گورنر ستیہ پال ملک سے علیحدہ ملاقات کریں گے اور جمعرات کو قومی راجدھانی نئی دہلی کے لئے روانہ ہونے سے قبل پریس کانفرنس سے خطاب کرسکتے ہیں۔ سرکاری ذرائع نے بتایا کہ مرکزی وزیر داخلہ کے دورے کے پیش نظر وادی کشمیر بالخصوص سری نگر میں سیکورٹی کے مثالی انتظامات کئے گئے ہیں۔ جھیل ڈل کے کنارے پر واقع شیر کشمیر انٹرنیشنل کنونشن سنٹر جہاں امیت شاہ سیکورٹی اجلاس کی صدارت کرنے کے علاوہ مختلف وفود سے ملیں گے ، کے ارد گرد کثیر دائروں والی سیکورٹی کا بندوبست کیا گیا ہے ۔