ممبئی: مرکزی وزیر امیت شاہ نے حال ہی میں این سی پی (ایس پی) کے سربراہ شرد پوار کو ’بدعنوانی کا سرغنہ‘ قرار دیا تھا۔ اب این سی پی (ایس پی) کے سربراہ شرد پوار نے ان کے اس بیان کے حوالہ سے جوابی حملہ کیا ہے۔ انہوں نے مرکزی وزیر داخلہ کو یاد دلایا ہے کہ کس طرح سپریم کورٹ نے انہیں ان کی آبائی ریاست گجرات سے جلاوطن کر دیا تھا۔ امیت شاہ پر جوابی حملہ کرتے ہوئے شرد پوار نے کہا کہ کچھ دن پہلے وزیر داخلہ امیت شاہ نے مجھ پر حملہ کیا تھا اور کچھ باتیں کہی تھیں۔ انہوں نے مجھے ملک کے تمام بدعنوان لوگوں کا سرغنہ قرار دیا تھا۔ یہ عجیب بات ہے کہ وزیر داخلہ وہ شخص ہیں جنہوں نے گجرات کے قانون کا غلط استعمال کیا اور اس کے لئے سپریم کورٹ نے انہیں گجرات سے تڑی پار (جلاوطن) کر دیا تھا۔ ان کا مزید کہنا تھا کہ جس کو جلاوطن کیا گیا تھا، وہ آج وزیر داخلہ ہے، اس لئے ہمیں یہ سوچنا چاہیے کہ ہم کہاں جا رہے ہیں۔ ہمیں غور کرنا چاہیے کہ جن لوگوں کے ہاتھ میں یہ ملک ہے وہ کس طرح غلط راستے پر گامزن ہیں۔ ورنہ مجھے صد فیصد یقین ہے کہ وہ ملک کو غلط راستے پر لے جائیں گے۔
