تمام ریاستوں کے چیف منسٹروں کو مرکزی وزیر اقلیتی امور کرن رجیجو کا مکتوب
حیدرآباد 23 نومبر(سیاست نیوز) مرکزی وزارت اقلیتی امور نے ملک بھر میں تمام چیف منسٹرس کو مکتوب روانہ کرکے خواہش کی کہ وہ ریاستی سطح پر UMEED پورٹل پر اندراجات کی تفصیلات کے حصول میں جائزہ اجلاس منعقد کریں اور صورتحال سے واقفیت حاصل کریں ۔ اس کی جامع رپورٹ مرکز کو روانہ کرنے کریں۔ مرکزی وزیر اقلیتی امور مسٹر کرن رجیجو نے چیف منسٹرس کو روانہ کردہ مکتوب میں اپیل کی کہ وہ ریاستی سطح پر امید پورٹل پر اندراجات کے عمل کا جائزہ لینے اجلاس منعقد کریں۔ انہوں نے بتایا کہ مرکزی وزارت اقلیتی امور نے وقف مرممہ قوانین کے تحت تمام موقوفہ جائیدادوں کے امید پورٹل پر اندراجات کے اقدامات کا آغاز کیا اور مرکزی وزارت سے ہیلپ لائن کے علاوہ عوام میں شعور اجاگر کرنے مہم بھی چلائی گئی اس کے باوجود ریاستی سطح پر اندراجات میں وزارت اقلیتی امور کو تفصیلات نہیں مل رہی ہیں۔ مسٹررجیجو نے صراحت کی کہ اب جبکہ پورٹل پر اندراجات کا عمل مکمل ہونے کی آخری تاریخ قریب آچکی ہے ایسے میںریاستی حکومتوں بالخصوص چیف منسٹرس کی ذمہ داری ہے کہ وہ ریاست میں اس پر عمل کا جائزہ لے کر رپورٹ روانہ کریں۔واضح رہے کہ پورٹل پر اندراجات کی تاریخ میں توسیع کیلئے مرکز سے متعدد نمائندگیاں کی جاچکی ہیں اور تلنگانہ چیف منسٹر ریونت ریڈی نے بھی مرکز کو مکتوب روانہ کیا جبکہ رکن پارلیمنٹ بیرسٹراسدالدین اویسی نے بھی وزیر اقلیتی امور سے ملاقات کرکے پورٹل پر اندراجات کی تاریخ میں توسیع کامکتوب حوالہ کیا ہے۔ اسی طرح مسلم پرسنل لاء بورڈ سے سپریم کورٹ میں درخواست داخل کرکے پورٹل پر اندراجات کی آخری تاریخ میں توسیع کی خواہش کی ہے ۔ ذرائع کے مطابق مختلف ریاستوں میں پورٹل پر اندراجات کی تفصیلات کے حصول کے بعد مرکزی وزارت اقلیتی امور سے تاریخ میں توسیع کے متعلق فیصلہ کا امکان ہے اسی لئے وزارت نے تمام چیف منسٹرس کو مکتوب روانہ کرکے جائزہ اجلاس منعقد کرنے کی خواہش کی ہے ۔3
