ریاض ۔ 9 ڈسمبر (سیاست ڈاٹ کام ) برطانوی باکسر انتھونی جوشوا نے میکسیکو نژاد امریکی حریف باکسرکو شکست دے کر دوسری بار ہیوی ویٹ ورلڈ خطاب جیت لیا۔ جیسا کہ ری میچ کا فیصلہ ریفریز کے متفقہ سکور پر ہوا۔ ریاض کے باکسنگ ارینا میں مکے بازی کا بڑا مقابلہ ورلڈ ہیوی ویٹ چمپئن بننے کے لیے برطانیہ کے انتھونی جوشوا اور میکسیکو نژاد امریکی فائٹر اینڈی روئز جونیئر کے درمیان ہوا۔ تماشائیوں سے کھچا کھچ بھرے میدان میں مسابقتی مقابلہ ہوا ۔ باکسنگ شائقین ہی نہیں، ماہرین بھی اس میچ سے محظوظ ہوئے۔ بارہ راؤنڈ کے میچ میں دونوں فائٹرز نے شاندار مظاہر کرتے ہوئے پھرتی، مہارت اور طاقت کا مظاہرہ کیا۔ چھوٹے قد اور فربہ جسم والے اینڈی روئز پر جوشووا کو برتری حاصل رہی۔ ایک ایک ٹیکنیکل پوائنٹ کے ساتھ بارہویں اور آخری راؤنڈ کا خاتمہ ہوا۔ ریفریز کے آزادانہ اور خود مختارانہ فیصلے نے برطانیہ کے انتھونی جوشوا کو فاتح قرار دے دیا جس پر انہوں نے زبردست خوشی منائی۔
