اجمیر : راجستھان میں عالمی شہرت یافتہ اجمیر میں واقع خواجہ معین الدین حسن چشتی کی درگاہ سے منسلک خادموں کی تنظیم انجمن سیدزادگان کے انتخابات کے لیے پیر کو ووٹنگ ہوگی۔الیکشن افسر ایس این ہاوا نے بتایا کہ انجمن کمیٹی کے لیے دو ہزار سے زائد ووٹرز 21 اراکین کو ووٹ دیں گے ۔ آزادانہ اور منصفانہ انتخابات کے لیے تمام تیاریاں مکمل کر لی گئی ہیں۔ درگاہ کے قریب امام باڑہ میں قائم پولنگ بوتھ پر صبح 7 بجے سے شام 5 بجے تک پولنگ ہوگی۔ ووٹ کے بعد نمائندوں کی موجودگی میں بیلٹ بکس کو سیل کر کے محفوظ رکھا جائے گا اور اگلے روزووٹوں کی گنتی کے بعدنتائج کا اعلان کیا جائے گا۔الیکشن کے پیش نظر درگاہ بازار کا علاقہ الیکشن کے رنگ میں شرابورہے ۔ درگاہ کے اطراف امیدوار اپنے اپنے بینرز اور پوسٹر لگا کر انتخابی مہم میں مصروف ہیں۔ الیکشن میں موجودہ قابض واحد دھڑے اور کبریا دھڑے کے درمیان براہ راست مقابلہ بتایا جا رہا ہے ۔
