وجے واڑہ: آندھرا کے سابق وزیر اعلیٰ اور ٹی ڈی پی سربراہ چندرابابو نائیڈو کو گرفتار کر لیا گیا ہے۔ ملی جانکاری کے مطابق ان کو وجئے واڑہ جیل بھیجا جانے کا امکان ہے ۔ نائیڈو کو انسداد بدعنوانی ایکٹ کے تحت گرفتار کیا گیا تھا۔ چندرا بابو کو آج صبح 6 بجے گرفتار کیا گیا۔ چندرا بابو نائیڈو کے خلاف آئی پی سی کی دفعہ 120 (بی)، 166، 167، 418، 420، 465، 468، 201، 109، 34 اور 37 کے تحت مقدمہ درج کیا گیا ہے۔ سوشل میڈیا پر یہ معلومات دیتے ہوئے ٹی ڈی پی نے کہا کہ آندھرا پردیش کے کرمنل انویسٹی گیشن ڈپارٹمنٹ (سی آئی ڈی) نے ٹی ڈی پی سربراہ اور آندھرا پردیش کے سابق وزیر اعلیٰ این چندرابابو نائیڈو کو نندیال میں گرفتار کر لیا ہے ۔
ٹی ڈی پی نے اس کا ایک ویڈیو بھی سوشل میڈیا پر شیئر کیا ہے۔ دوسری جانب ٹی ڈی پی سربراہ اور آندھرا پردیش کے سابق وزیر اعلیٰ این چندرا بابو نائیڈو کے وکیل کا کہنا ہے کہ ہائی بلڈ پریشر اور شوگر کا پتہ لگانے کے بعد سی آئی ڈی چندرا بابو کو طبی معائنہ کے لیے لے گئی ہے۔ ہم ضمانت کے لیے ہائی کورٹ کا دروازہ کھٹکھٹا رہے ہیں۔ بتایا گیا کہ چندرا بابو نائیڈو کو ہفتہ کو سی آئی ڈی نے سکل ڈیولپمنٹ اسکام کیس میں بدعنوانی کے الزام میں گرفتار کیا تھا۔ نائیڈو کے خلاف لگائی گئی دفعات غیر ضمانتی ہیں۔ اس معاملے کی ایف آئی آر 2021 میں درج کی گئی تھی۔