دی کیرالہ اسٹوری 2 پر تنقید ۔منافع کو کہانی اور مواد پر ترجیح دینے کا الزام
ممبئی ۔ 23؍فروری ( ایجنسیز )انوراگ کشیپ مسلم مخالف فلم بنانے والوں پر برس پڑے اور شدید برہمی کا اظہار کیا۔ تفصیلات کے مطابق بالی ووڈ فلم ساز اور اداکار انوراگ کشیپ نے آئندہ آنیوالی مسلمان مخالف فلم دی کیرالہ اسٹوری 2 کو شدید تنقید کا نشانہ بناتے ہوئے اسے پروپیگنڈا قرار دیا اور الزام لگایا کہ فلم ساز منافع کو کہانی اور مواد پر ترجیح دے رہے ہیں۔یہ سیکیوئل، جو تقریباً تین سال بعد ریلیز ہو رہا ہے ایک بار پھر تنازعہ کو جنم دے دیا ہے۔ اس فلم کو ویپول امرت لال شاہ نے پروڈیوس اور کماکھیا نارائن سنگھ نے ڈائریکٹ کیا ہے۔انوراگ کشیپ نے کوچی ایئر پورٹ پر میڈیا سے گفتگو میں کہا کہ اس فلم کا مقصد دیکھنے والوں کو تقسیم کرنا ہے۔ اسکی کوئی بامعنی کہانی نہیں۔ انہوں نے ایک متنازعہ منظر کا حوالہ بھی دیا جس میں ایک خاتون کو زبردستی گوشت کھلاتے ہوئے دکھایا گیا ہے۔ انوراگ کشیپ نے کہا کہ یہ سب بکواس ہے۔ کوئی اس طرح گوشت نہیں کھلاتا نہ ہی کوئی کھچڑی اس طرح پیش کرتا ہے۔ فلم کا مقصد صرف پیسہ کمانا ہے۔ فلم ساز لالچی ہے۔دوسری جانب ماہر حیاتیات سری دیو نمبودری نے کیرالہ ہائی کورٹ میں فلم کی ریلیز کو چیلنج کرنے کیلئے درخواست دائر کی ہے۔
