ریاض: سعودی وزیر افرادی قوت و سماجی بہبود انجینیئر احمد الراجحی نے اسکولوں میں تدریس کی ملازمتیں سعودیوں کے لیے مختص کرنے کا فیصلہ جاری کیا ہے۔ فیصلہ مرحلہ وار تین برسوں میں نافذ کیا جائے گا۔ الاخباریہ چینل کے مطابق انٹرنیشنل اور خانگی گرلز اینڈ بوائز اسکولوں میں پہلے مرحلے میں خصوصی مضامین کی تدریس کی ذمہ داری سعودیوں کو تفویض کی جائے گی۔ فیصلے کا مقصد یہ ہے کہ ریاضی، فزکس، بائیولوجی، سائنس اور کمپیوٹر جیسے تمام مضامین پرائیویٹ اسکولوں میں زیادہ سے زیادہ سعودی اساتذہ پڑھائیں جبکہ انٹرنیشنل اسکولوں میں تدریسی وظائف کی سعودائزیشن کا فیصلہ عربی زبان، قومی شناخت، اسلامک و سوشل سٹڈیز، آرٹ اور ورزش جیسے مضامین کے زیادہ سے زیادہ اساتذہ سعودی رکھے جائیں گے۔ شروعات ان مضامین میں سعودائزیشن سے ہوگی۔ احمد الراجحی کے اس فیصلے کا ہدف آئندہ تین برسوں کے دوران پرائیویٹ اور انٹرنیشنل اسکولوں میں 26 ہزار سعودی اساتذہ رکھنا ہے۔ یہ فیصلہ لیبر مارکیٹ میں سعودیوں کو زیادہ سے زیادہ مواقع فراہم کرنے اور سعودائزیشن سے متعلق وزارت کے ماسٹر پلان سے مطابقت رکھتا ہے۔ اس فیصلے کی بدولت مجموعی قومی پیداوار کا مشن مستحکم ہوگا۔
