اسرائیل کو کسی بھی ایسی کارروائی سے گریز کرنے کا حکم جو نسل کشی کنونشن اصولوں کے مغائر ہو : آئی سی جے پیانل
یروشلم : غزہ میں فلسطینیوں کے خلاف اسرائیل کے ہاتھوں نسل کشی کے جرائم کے حوالے سے جنوبی افریقہ کی جانب سے عالمی عدالت انصاف میں دی گئی درخواست پرعدالت کے فیصلے پر عالمی سطح پر غیرمعمولی رد عمل سامنے آیا ہے ۔جمعہ کے روز اقوام متحدہ کی اعلیٰ ترین عدالت آئی سی جے نے اسرائیل کو حکم دیا کہ وہ غزہ کی پٹی میں اپنی جنگ میں نسل کشی کیلئے براہ راست اُکسانے کی روک تھام اور سزا دینے کیلئے اقدامات کرے ۔العربیہ کے مطابق عدالت نے کہا کہ ریاست اسرائیل کو نسل کشی کنونشن کے آرٹیکل II کے دائرہ کار میں تمام کارروائیوں کو روکنے کیلئے اپنی بساط کے مطابق تمام اقدامات کرے ۔17 ججوں پر مشتمل آئی سی جے پینل کی ایک بڑی اکثریت نے غزہ میں اسرائیلی فوجی کارروائی کو روکنے کی ہدایت کے علاوہ جنوبی افریقہ کی درخواستوں میں سے زیادہ تر پر فوری اقدامات کے حق میں ووٹ دیا۔ عدالت نے اسرائیل کو حکم دیا کہ وہ کسی بھی ایسی کارروائی سے باز رہے جو نسل کشی کنونشن کے اصولوں کے تحت آتی ہو۔ ساتھ ہی اس بات کو یقینی بنائے کہ اس کی افواج غزہ میں نسل کشی کی کوئی کارروائی نہ کریں۔فلسطینی وزارت خارجہ نے عالمی عدالت انصاف کے فیصلے کا خیرمقدم کیا اور کہا کہ یہ ایک اہم یاد دہانی ہے کہ کوئی بھی ریاست قانون سے بالاتر نہیں ہے ۔فلسطینی وزیر خارجہ ریاض المالکی نے جمعہ کو ٹیلی ویژن پر نشر ہونے والی ایک تقریر میں کہا کہ عدالت کے ججوں نے حقائق کا جائزہ لیا اور انسانیت اور بین الاقوامی قانون کے حق میں فیصلہ دیا۔انہوں نے مزید کہا کہ فلسطین اسرائیل سمیت تمام ممالک سے مطالبہ کرتا ہے کہ وہ عدالت کے حکم پر عارضی اقدامات پر عمل درآمد کو یقینی بنائیں۔جمعہ کے روز جنوبی افریقہ نے بین الاقوامی عدالت انصاف کے جاری کردہ اس فیصلے کی تعریف کی جس میں کہا گیا تھا کہ اسرائیل کو غزہ میں نسل کشی کی کسی بھی کارروائی کو روکنے کیلئے اپنی طاقت میں ہر ممکن اقدام کرنا چاہیے ۔جنوبی افریقہ کی وزارت خارجہ نے کہا کہ آج کا دن بین الاقوامی قانون کی حکمرانی کیلئے فیصلہ کن فتح اور فلسطینی عوام کیلئے انصاف کے حصول میں ایک اہم موڑ کی نمائندگی کرتا ہے۔ دریں اثناء فلسطینی تحریک مزاحمت [حماس] نے جنوبی افریقہ کی درخواست پر فلسطینیوں کی نسل کشی کے خلاف عالمی عدالت انصاف کا خیر مقدم کرتے ہوئے حمایت کی ہے ۔ اس امر کا اعلان حماس نے ایک بیان میں کیا ہے ۔بیان میں حماس نے یہ مطالبہ بھی کیا ہے کہ عالمی برادری اسرائیل سے بین الاقوامی عدالت انصاف کے فیصلے پر عمل درآمد کرائے اور اسرائیلی کے ہاتھوں فلسطینیوں کی نسل کشی رکوانے میں اپنی ذمہ داری ادا کرے ۔حماس کے ایک سینئیر رہنما سمیع ابو زہری عدالت انصاف کے فیصلے کے بارے میں رائٹر سے بات کرتے ہوئے کہا کہ یہ فیصلہ غزہ میں اسرائیلی جنگی جرائم کو بے نقاب کرنے اور اسرائیل کو عالمی سطح پر تنہا کرنے میں معاون ثابت ہو گا۔انہوں نے کہا کہ ہم مطالبہ کرتے ہیں کہ قابض اسرائیل کو مجبور کیا جائے کہ وہ بین الاقوامی عدالت انصاف کے اس فیصلے پر عمل درآمد کرے ۔واضح رہے جنوبی افریقہ نے ماہ دسمبر کے اواخر بین الاقوامی عدالت انصاف میں اسرائیل کے خلاف دائر کی تھی۔ جس میں اسرائیل کو غزہ میں نسل کشی سے روکنے کا مطالبہ کیا گیا تھا۔
