لاہور۔ 15 اگست (سیاست ڈاٹ کام) انڈر 19 ایشیاء کب 5 سے 14 ستمبر 2019ء تک سری لنکا میں ہوگا جس میں میزبان سری لنکا کے ساتھ پاکستان، بنگلہ دیش، متحدہ عرب امارات، نیپال، کویت، افغانستان اور ہندوستان کی ٹیمیں حصہ لیں گی۔ ٹورنمنٹ میں پاکستان کی 15 رکنی ٹیم کی قیادت وکٹ کیپر روحیل نذیر کریں گے، حیران کن طور پر ٹیسٹ فاسٹ بولر سلیم جعفر کی سربراہی میں کام کرنے والی 5 رکنی سلیکشن کمیٹی نے ایشیاء کپ اسکواڈ میں کراچی کے ایک بھی کھلاڑی کو موقع نہیں دیا۔دورہ جنوبی افریقہ میں 7-0 سے ون ڈے سیریز جیتنے والے اسکواڈ میں شامل صائم ایوب کو ڈراپ کرکے کوئٹہ کے عبدالواجد بنگل زئی کو اسکواڈ کا حصہ بنایا گیا۔ بنگل زئی نے انڈر 19 ون ڈے ٹورنمنٹ کی 5 اننگز میں محض 116 رنز بنائے، اس حوالے سے چیف سلیکٹر سلیم جعفر کا مؤقف ہے کہ دائیں ہاتھ کے بیٹسمین نیٹ پر بڑی عمدہ بیٹنگ کر رہے تھے۔ایشیاء کپ اسکواڈ میں شامل لاہور کے قاسم اکرم دورہ جنوبی افریقہ کے 5 مقابلوں میں77 رنز بنانے کے باوجود اسکواڈ میں جگہ برقرار رکھنے میں کامیاب رہے۔ سلیکشن کمیٹی نے ڈیرہ مراد جمالی کے دائیں ہاتھ کے اسپنر ابو ہریرہ کو بغیر کھیلے منتخب کرلیا جبکہ کراچی کے اسپنر عالیان محمود جنھوں نے انڈر 16 کے ساتھ آسڑیلیا کا دورہ کیا، انہیں نظرانداز کردیا گیا۔ ایشیاء کپ اسکواڈ میں فاسٹ بولر شیراز خان جنھوں نے جنوبی افریقہ کے خلاف 3 میچوں میں 5 وکٹیں حاصل کیں، انہیں بھی منتخب نہیں کیا گیا لیکن خیبرپختونخوا کے 18 سال کے محمد وسیم جونئیر جو دورہ جنوبی افریقہ میں تین میچوں میں صرف 3 وکٹ لے سکے، انھیں منتخب کرلیا گیا۔ انڈر 19 ایشیاء کپ میں پاکستان کے 10 شہروں سے 15 کھلاڑی منتخب کئے گئے، البتہ پاکستان کرکٹ کی نرسری کہلانے والے کراچی شہر سے ایک بھی کرکٹر کو منتخب نہ کئے جانے پر چہ مگوئیاں ہو رہی ہیں اور کرکٹ کے حلقوں میں اس فیصلے پر تشویش کا اظہار کیا جارہا ہے۔
