جکارتہ ۔3 اگسٹ ۔(سیاست ڈاٹ کام)انڈونیشیا میں ہفتے کے روز ذمے داران نے بتایا ہے کہ جزائرِ جاوا کے ساحل کے نزدیک جمعہ کی شام زور دار زلزلہ آنے کے نتیجے میں کم از کم ایک شخص ہلاک اور متعدد زخمی ہو گئے۔ زلزلے کے بعد حکام کی جانب سے سونامی کی وارننگ جاری کر دی گئی تھی جو چند گھنٹوں بعد واپس لے لی گئی۔ریکٹر اسکیل پر زلزلے کی شدت 6.9 تھی۔ اس کے نتیجے میں متاثرہ علاقے کے لوگ بھاگ کر اونچے مقامات پر چلے گئے جب کہ دارالحکومت جکارتہ میں شہریوں کی ایک بڑی تعداد سڑکوں پر آ گئی۔حکام نے بتایا کہ زلزلہ آنے پر حرکت قلب بند ہونے کے نتیجے میں ایک 48 سالہ خاتون فوت ہو گئی۔ اس دوران ایک ہزار سے زیادہ افراد کو متاثرہ علاقے سے نکال کر عبوری پناہ کے مراکز پہنچایا گیا۔ ان میں پڑوسی جزیرے سماٹرا کے رہنے والے لوگ بھی شامل ہیں۔انڈونیشیا میں قدرتی آفات سے نمٹنے والی سرکاری ایجنسی کے مطابق زلزلے کے سبب 100 عمارتوں کو نقصان پہنچا جب کہ 34 کے قریب گھر تباہ ہو گئے۔گذشتہ برس 7.5 شدت کے زلزلے کے بعد سونامی کے نتیجے میں سولاویسی جزیرے کے علاقے بالو میں 2200 سے زیادہ افراد ہلاک اور ہزاروں لا پتہ ہو گئے تھے۔