تھائی حریف کو ہرایا، سریکانت کو کوارٹر فائنلس میں شکست
جکارتہ ۔25 جنوری ۔ (سیاست ڈاٹ کام ) سائنا نہوال نے بڑی آسانی سے اس سیزن میں متواتر دوسری مرتبہ سیمی فائنل میں رسائی حاصل کرلی لیکن انڈونیشیاء ماسٹرس بیاڈمنٹن ٹورنمنٹ میں آج یہاں کدمبی سریکانت کو اُن کے کوارٹر فائنل میچ میں شکست ہوگئی ۔ پانچویں سیڈ سائنا جو گزشتہ ہفتے ملائیشیا ماسٹرس میں سیمی فائنل تک پہونچی تھیں، اُنھوں نے یہاں ویمنس سنگلز کے آخری چار کے مقابلے میں رسائی کیلئے تھائی لینڈ کی پی چوچووانگ کو 21-7، 21-18 سے ہرایا ۔ دو مرتبہ کی کامن ویلتھ گیمس چمپیئن کا اگلا مقابلہ دیگر کوارٹر فائنل میں دو چینی شٹلرس ہی بینگ ژیاؤ اور چینگ ژیاؤ ژین کے درمیان ونر سے ہوگا ۔ تاہم سریکانت کو دوسری بار کوارٹر فائنل میں اختتام پر اکتفاء کرنا پڑا جبکہ وہ مقامی ہیرو اور ایشین گیمس چیمپئن جوناتھن کرسٹی کے مقابل 18-21 ، 19-21 سے ہارے ۔
