lایگزٹ پول مباحثوں مین انڈیا اتحاد کے قائدین کی شرکت کا فیصلہ‘ ووٹوں کی گنتی کے دن چوکسی کی ہدایت
lاتحاد کے قائدین کے اجلاس میں اہم امور پر تبادلہ خیال‘ صدرکانگریس کی پریس کانفرنس
نئی دہلی :کانگریس صدر ملکارجن کھرگے کی رہائش پر انڈیا اتحاد کے سرکردہ قائدین کی میٹنگ ختم ہو گئی ہے۔ اس میٹنگ کے بعد ملکارجن کھرگے نے میڈیا سے بات چیت کرتے ہوئے کہا کہ میٹنگ تقریباً 2.30 گھنٹے تک جاری رہی۔ ہم نے کئی اہم نکات پر گفتگو کی۔ ہمیں ووٹ شماری کے دن کیسی پالیسی اختیار کرنی ہے اس پر بھی سبھی پارٹیوں کے ساتھ بات چیت ہوئی۔ ساتھ ہی انھوں نے یہ بھی جانکاری دی کہ میٹنگ میں فیصلہ لیا گیا ہے کہ ایگزٹ پول پر ہونے والے مباحثوں مین انڈیا اتحاد کے لیڈران شرکت کریں گے تاکہ بی جے پی اور اس کے نظام کو بے نقاب کیا جا سکے۔ملکارجن کھرگے نے اس دوران انڈیا اتحاد کو کم از کم 295 سیٹیں حاصل ہونے کا دعویٰ بھی کیا۔ انھوں نے کہا کہ عوام سے جو نمبر ملے ہیں اس کے مطابق انڈیا اتحاد 295 سے زیادہ سیٹیں حاصل کر رہی ہے۔ سبھی پارٹیوں سے پوچھنے کے بعد اس نمبر کا اندازہ لگایا گیا ہے۔ کھرگے نے میڈیا میں آنے والے ایگزٹ پول سے پہلے ہی میڈیا کے ایگزٹ پول کو مسترد بھی کر دیا اور کہا کہ سرکاری سروے میں نمبرس اوپر نیچے کر دیے جاتے ہیں لیکن جو نمبر (295) ہمارے پاس ہے وہ عوام کا سروے ہے۔ملکارجن کھرگے نے میٹنگ کے بعد منعقد پریس کانفرنس میں یہ بھی بتایا کہ انڈیا اتحاد کی سبھی پارٹیوں نے اس بات پر گفتگو کی کہ ووٹ شماری کے وقت کس طرح کے مسائل کا سامنا کرنا پڑ سکتا ہے اور اس سے کس طرح نمٹا جائے۔ سبھی پارٹیاں اپنے کارکنان کو یہ ہدایت بھی دیں گی کہ ووٹ شماری کے دن مستعد رہیں اور احتیاط کے ساتھ سبھی چیزوں پر نظر رکھیں۔ کانگریس صدر نے یہ بھی کہا کہ ووٹ شماری کے دن انڈیا اتحاد میں شامل سبھی پارٹیوں کے کیڈر کو خاص احتیاط رکھنا ہوگا اور کسی بھی حال میں ووٹ شماری کا عمل پوری طرح مکمل ہونے سے پہلے ذمہ داران کاؤنٹنگ ہال سے باہر نہ نکلیں۔کانگریس صدر کھرگے نے الیکشن کمیشن کے سامنے کچھ باتیں رکھنے کا بھی تذکرہ میڈیا کے سامنے کیا۔ انھوں نے بتایا کہ الیکشن کمیشن سے ملاقات کا وقت طلب کیا گیا ہے اور جیسے ہی وقت ملے گا انڈیا اتحاد کے لیڈران ان کے پاس جا کر ایک میمورنڈم پیش کریں گے اور مطالبہ کریں گے کہ اس میں شامل نکات پر غور کرتے ہوئے کچھ اہم ہدایات ووٹ شماری میں شامل افسران و اہلکاروں کو دی جائیں۔