انکیتا قتل کیس: پلکت آریہ کی ملکیت قرق کرنے کی سفارش

   

دہرا دون: اتراکھنڈ کے مشہور انکیتا بھنڈاری قتل واقعہ میں پوڑی پولیس کے ذریعہ سخت قدم اٹھانے کا راستہ صاف کر دیا گیا ہے۔ پوڑی کے ایس ایس پی نے اس قتل معاملہ کے کلیدی ملزم پلکت آریہ کی ملکیت قرق کرنے کی سفارش جاری کر دی ہے۔ اس تعلق سے ہریدوار اور پوڑی کے ضلع مجسٹریٹ کو رپورٹ بھی بھیج دی گئی ہے۔ منظم طریقہ سے گروہ بنا کر جرم انجام دینے والے انکتا قتل واقعہ کے ملزم پلکت آریہ کے خلاف گینگسٹر ایکٹ کے تحت کارروائی کی جا رہی ہے اور مجموعی طور پر تقریباً 2.75 کروڑ روپے کی ملکیت ضبط کرنے کیلئے ضلع مجسٹریٹ کو رپورٹ بھیجی گئی ہے۔ قابل ذکر ہے کہ نینی تال ہائی کورٹ نے مشہور انکیتا بھنڈاری قتل معاملہ کے کلیدی ملزم پلکت کے نارکو اور پالیگراف ٹسٹ کرانے پر فی الحال روک لگا دی ہے۔
عدالت نے اس معاملے میں حکومت سے تین ہفتہ میں جواب مانگا ہے۔ عدالت نے اس معاملے پر آئندہ سماعت کے لیے تین ہفتہ بعد کی ہی تاریخ مقرر کی ہے۔