سنچورین ۔30 ڈسمبر (سیاست ڈاٹ کام) جنوبی افریقہ نے کوئنٹن ڈی کوک اور بولروں کی شاندار کارکردگی کی بدولت انگلینڈ کو پہلے ٹسٹ میچ میں 107رنز سے شکست دے کر سیریز میں 0-1 کی برتری حاصل کر لی۔ سنچورین میں کھیلے گئے سیریز کے پہلے ٹسٹ میچ میں انگلینڈ نے ٹاس جیت کر پہلے بولنگ کا فیصلہ کیا تو جنوبی افریقہ کی ٹیم پہلی اننگز میں 284رنز بنا کر آؤٹ ہو گئی۔ جنوبی افریقہ کی جانب سے کوئنٹن ڈی کوک نے 95 جبکہ زبیر حمزہ نے 39، ورنان فلینڈر نے 35 اور ڈوانے پریٹوریس نے 33رنز کی اننگز کھیلیں۔ انگلینڈ کی جانب سے پہلی اننگز میں اسٹورٹ براڈ اور پہلا میچ کھیلنے والے سیم کرن نے فی کس چار وکٹیں لیں۔ اس کے جواب میں انگلینڈ کی ٹیم پہلی اننگز میں صرف 181 رنز بنا سکی، جو ڈینلی نے نصف سنچری اسکور کی جبکہ بین اسٹوکس نے 35 اور جیو روٹ نے 29 رنزبنائے۔ جنوبی افریقہ کے لئے فلینڈر نے 4 اور کگیسو ربادا نے تین وکٹیں حاصل کیں۔ جنوبی افریقہ کی ٹیم دوسری اننگز میں بھی 62 رنز پر چار وکٹیں گنوا چکی تھی لیکن لوور مڈل آرڈر نے ٹیم کی لاج رکھ لی اور چھوٹی چھوٹی شراکتیں قائم کرکے ٹیم کو 272 رنز کے مجموعے تک رسائی دلائی جس کی بدولت میزبان ٹیم نے انگلینڈ کو فتح کے لیے 376رنز کا مشکل ہدف دیا۔ پہلا میچ کھیلنے والے راسی وین درڈوسن نے 51، اینرچ نورجے 40، فلینڈر 46 اور کوئنٹن ڈی کوک 34 رنز بنائے جبکہ انگلینڈ کی جانب سے جوفرا آرچر نے 5وکٹیں لینے کا کارنامہ انجام دیا۔ 376رنز کے ہدف کے تعاقب میں انگلش اوپنرز نے پراعتماد انداز میں اننگز کا آغاز کرتے ہوئے 92 رنزکی شراکت قائم کی لیکن کیشپ مہاراج کی ایک گیند پر غلط شارٹ نے ڈوم سبلی کی 29 رنز کی اننگز کا خاتمہ کردیا۔ اس کے ڈینلی آئے اور دونوں نے مزید 47رنز جوڑ کر اسکور کو 139تک پہنچا دیا لیکن 84رنز بنانے والے اوپنر نورجے کو وکٹ دے بیٹھے جبکہ ڈینلی بھی 31رنز بنا کر پویلین لوٹ گئے۔ چوتھی وکٹ کے لیے بین اسٹوکس اور جیو روٹ نے 44 رنز جوڑنے کے ساتھ ساتھ ٹیم کی ڈبل سنچری بھی مکمل کروائی لیکن کیشپ مہاراج نے آل راؤنڈر کی وکٹیں بکھیر کر اپنی ٹیم کو میچ میں بڑی کامیابی دلا دی۔ اس کے بعد 48 رنز کی اننگز کھیلنے والے جیو روٹ نے کچھ دیر تک مزاحمت کا مظاہرہ کیا لیکن دیگرکوئی بھی بیٹسمین کگیسو ربادا کے تباہ کن اسپیل کا سامنا نہ کر سکا اور پوری انگلش ٹیم 268رنز پر ڈھیر ہو کر میچ میں 107رنز سے شکست کھا بیٹھی۔ جنوبی افریقہ کی جانب سے کگیسو ربادا نے 4 اور نورجے نے تین وکٹیں حاصل کیں۔ کوئنٹن ڈی کوک کو شاندار بیٹنگ اور 8کیچ پکڑنے پر میچ کا بہترین کھلاڑی قرار دیا گیا۔ اس میچ میں فتح کے ساتھ ہی جنوبی افریقہ نے 4 ٹسٹ میچوں کی سیریز میں 0-4 کی برتری حاصل کر لی ہے جہاں سیریز کا دوسرا ٹسٹ میچ 3جنوری کو کیپ ٹاؤن میں کھیلا جائے گا۔
