کولمبو ۔14 مارچ (سیاست ڈاٹ کام)کورونا وائرس کے عالمی سطح پر بڑھتے ہوئے خطرے کے پیش نظر انگلینڈ نے سری لنکا کا دورہ منسوخ کردیا ہے اور دورے کا شیڈول بعد میں دوبارہ ترتیب دیا جائے گا۔ سری لنکا اور انگلینڈ کے درمیان سیریز کا پہلا ٹسٹ میچ 19مارچ کو شروع ہونا تھا لیکن دونوں کرکٹ بورڈز نے باہمی مشاورت سے سیریز نہ کھیلنے کا فیصلہ کیا۔ انگلش کرکٹ بورڈ کے ترجمان کے مطابق سری لنکا میں ہماری ٹیم اور سری لنکن کرکٹ بورڈ کے درمیان ہونے والے مذاکرات کے بعد یہ فیصلہ کیا گیا کہ سیریز کو فی الحال ملتوی کردیا جائے اورکھلاڑیوں اورمعاون عملہ کو گھر واپس لایا جائے، ہم سیریزکو دوبارہ شیڈول کرنے کا ارادہ رکھتے ہیں۔سری لنکا نے شائقین کے بغیر میدان بند کر کے بھی میچز کے انعقاد کی پیشکش کی تھی لیکن انگلش کرکٹ بورڈ نے یہ کہتے ہوئے مکمل دورہ ملتوی کرنے پر اصرارکیا کہ ان کے کھلاڑی اس صورتحال میں مکمل توجہ کے ساتھ ٹسٹ سیریز میں شرکت نہیں کر سکیں گے اور یہ فیصلہ کرکٹ سے بالاتر ہے۔ قابل ذکر ہے کہ ابھی تک برطانیہ کے مقابلے میں سری لنکا میں کورونا وائرس سے کم لوگ متاثر ہوئے ہیں اور اب تک صرف 3 افراد میں وائرس کی تصدیق ہوئی ہے، تاہم وائرس کے پھیلاؤ کو روکنے کے لیے سرحدوں کی ممکنہ بندش اور بین الاقوامی پروازوں کی منسوخی کے امکان کے پیش نظر انگلینڈکے کھلاڑیوں نے اپنے اہلخانہ کے پاس واپسی کی خواہش ظاہر کی۔انگلش بورڈ نے کہا کہ کورونا وائرس کی دنیا بھر میں بگڑتی ہوئی صورتحال کے پیش نظر سری لنکن کرکٹ حکام سے مشاورت کے بعد ہم نے انگلینڈ اور سری لنکا کے درمیان سیریز کے ملتوی اورکھلاڑیوں کی برطانیہ واپسی کا فیصلہ کیا ہے۔ یہ دورہ ملتوی ہونے کا جہاں سری لنکا کو بڑا مالی نقصان ہوا ہے وہیں رواں سال انگلینڈ کے مصروف شیڈول کو مدنظر رکھتے ہوئے سیریزکا جنوری 2021 سے قبل انعقاد مشکل نظرآتاہے۔ انگلینڈ کو اگلا دورہ جون میں ویسٹ انڈیز کا کرنا ہے لیکن موجودہ صورتحال کے پیش نظر یہ دورہ بھی مشکل میں پڑتا نظر آ رہا ہے کیونکہ ماہرین نے کہا ہے کہ برطانیہ میں یہ وائرس 10 تا 14 ہفتوں بعد اپنے عروج پر پہنچے گا۔
یہاں یہ بات قابل ذکر ہے کہ انگلینڈ کی ٹی20 لیگ ٹی20 بلاسٹ کا آغاز بھی 28 مئی سے ہونا ہے اور یہ 12 جولائی تک جاری رہے گی لیکن وائرس کے خطرے کے پیش نظر اب یہ ایونٹ بھی متاثر ہو سکتا ہے۔ انگلینڈ اور سری لنکا کے درمیان سیریز ورلڈ ٹسٹ چمپیئن شپ کا حصہ تھی جس میں دو ٹسٹ میچ کھیلے جانے تھے۔