چوتھے ٹسٹ میں افریقہ کو 191 کی شکست ،اسٹوکس مین آف دی سیریز
جوہانسبرگ ۔ 28 جنوری (سیاست ڈاٹ کام) انگلینڈ نے مارک ووڈ کی شاندار بولنگ کی بدولت جنوبی افریقہ کو چوتھے ٹسٹ میچ میں 191 رنز سے شکست دے کر چار میچوں کی سیریز 1-3 سے اپنے نام کر لی۔ جوہانسبرگ میں کھیلے گئے سیریز کے چوتھے اور آخری ٹسٹ میچ میں انگلینڈ نے ٹاس جیت کر پہلے بیٹنگ کا فیصلہ کیا۔ انگلینڈ نے زیک کرالی، کپتان جو روٹ اور اولی پوپ کی نصف سنچریوں کی بدولت پہلی اننگز میں 400 رنز بنائے، جنوبی افریقہ کی جانب سے اینرچ نورجے نے 5 وکٹیں حاصل کیں۔ جواب میں پہلی اننگز میں کوئنٹن ڈی کاک کی 76 رنز کی اننگز کے باوجود جنوبی افریقہ کی ٹیم 183رنز پر ڈھیر ہو گئی، انگلینڈ کی جانب سے مارک ووڈ نے پانچ جبکہ کرس ووکس اور بین اسٹوکس نے فی کس دو وکٹیں حاصل کیں۔ انگلینڈ نے 217 رنز کی برتری کے باوجود فالوآن نہیںکروایا اور دوسری اننگز میں جو روٹ کی نصف سنچری کے باوجود 248 رنز بنا کر آؤٹ ہو گئی، جنوبی افریقہ کے بیورن ہینڈرکس نے 5 وکٹیں لیں۔ پہلی اننگز میں بھاری برتری کی بدولت انگلینڈ نے جنوبی افریقہ کو فتح اور سیریز بچانے کے لیے 466 رنز کا مشکل ہدف دیا۔ دوسری اننگز میں وین ڈر ڈوسن کی98 رنز کی شاندار اننگز کے باوجود جنوبی افریقہ کی ٹیم 274 رنز بنا کر ڈھیر ہوگئی اورکوئی بھی بیٹسمین ان کا ساتھ نہ دے سکا۔انگلینڈ نے میچ میں 191 رنز سے فتح کی بدولت سیریز بھی 1-3 سے اپنے نام کر لی۔ دوسری اننگز میں 4 وکٹوں سمیت میچ میں 9 وکٹیں لینے والے فاسٹ بولرمارک ووڈ کو میچ کا بہترین کھلاڑی قرار دیا گیا۔ بہترین آل راؤنڈ کھیل پیش کرنے پر بین اسٹوکس کو سیریز کا بہترین کھلاڑی منتخب کیاگیا۔
