برمنگھم ۔9 ستمبر (سیاست ڈاٹ کام )آسٹریلیا نے ونڈے ورلڈ چمپیئن انگلینڈ کو ایشز کے چوتھے ٹسٹ میں باآسانی 185 رنز سے شکست دے کر سیریز میں 2-1 کی ناقابل تسخیر برتری حاصل کرلی۔برمنگھم میں کھیلے گئے ایشز کے چوتھے میچ کے آخری دن جب کھیل کا آغاز ہوا تو انگلینڈ کی ٹیم 383 رنز کے ہدف کے تعاقب میں 2 وکٹوں پر 18 رنز بنا کر شدید مشکلات کا شکار تھی۔جیسن روئے اور ڈینلی نے انگلینڈ کا اسکور 66 رنز تک پہنچایا تھا کہ پیٹ کمنز نے روئے کی وکٹیں اڑا دیں جو31 رنز بنا کر کھیل رہے تھے جس کے بعد بین اسٹوکس صرف ایک رن بنا کر کمنز کا نشانہ بنے۔ڈینلی نے مزاحمت کی کوشش کی لیکن ان کی اننگز 53 رنز سے آگے نہ بڑھ سکی اور انہیں اسپنر نیتھن لیون نے آؤٹ کیا ۔ دوسرے سرے پر جونی بیئراسٹو نے 25 رنز کی اننگز کھیلی جس کے بعد بٹلر نے 34 رنز بنائے۔انگلینڈ کی 6 وکٹیں صرف 138 رنز پرگر چکی تھیں جس کے بعد لوور آرڈر بھی جلد آؤٹ ہوتے گئے تاہم اننگز کی خاص بات یہ تھی بیٹسمینوں کی جانب سے رنز بنانے کے بجائے وکٹ پر زیادہ سے زیادہ ٹھہرنے کی کوشش کی۔ جیسن روئے نے 123 گیندوں کا سامنا کرنے کے بعد53 رنز بنائے تو بٹلر نے 34 رنز کے لئے 111 اور اوورٹن نے 105 گیندوں پر صرف 21 رنز بنائے۔ آسٹریلیا نے انگلینڈ کی پوری ٹیم 197رنز بنا کر آؤٹ کردی اور 185 رنز کے واضح فرق سے کامیابی حاصل حاصل کی اور سیریز میں ناقابل تسخیر برتری حاصل کرتے ہوئے ایشز میں شکست سے خود بچالیا۔کمنز نے سب سے زیادہ 4 وکٹیں حاصل کیں، ہیزل ووڈ اورلیون نے فی کس2 کھلاڑیوں کو آؤٹ کیا۔ آسٹریلیا کے اسٹیو اسمتھ کو میچ میں شان دار بیٹنگ پر بہترین کھلاڑی قرار دیا گیا۔ خیال رہے کہ آسٹریلیا نے پہلی اننگز 497 اوردوسری اننگز 186 رنز بنا کرختم کردی تھی جبکہ انگلینڈ نے پہلی اننگز میں 301 اور دوسری اننگز میں 197 رنز بناسکی تھی۔
