کوالالمپور ۔10 ڈسمبر (سیاست ڈاٹ کام )آئی سی سی ویمنز چمپئن شپ میں تین ونڈے میچوں پر مشتمل سیریز کے پہلے میچ میں انگلینڈ ویمنزکرکٹ ٹیم نے پاکستان ویمنز کرکٹ ٹیم کو 75 رنز سے شکست دے کر سیریز میں 0-1 کی برتری حاصل کرلی ہے۔ مہمان ٹیم نے پہلے کھیلتے ہوئے 285 رنز کا ہدف دیا۔ جواب میں پاکستان کی پوری ٹیم 209 رنز بناکر آؤٹ ہوگئی۔کنرارا اوول، کوالالمپور کے میچ میں انگلینڈ ویمنز کرکٹ ٹیم کی کپتان ہیتھر نائٹ نے ٹاس جیت کر پہلے بیٹنگ کا فیصلہ کیا تو اوپنرز ڈینی ویٹ اور بیو مونٹ کی شاندار سنچریوں کی بدولت مہمان ٹیم نے مقررہ 50 اوورز میں 6 وکٹوں کے نقصان پر 284 رنز بنائے۔ ڈینی ویٹ نے 95 گیندوں پر 12چوکوں اور 3 چھکوں کی مدد سے 110 رنز کی عمدہ اننگز کھیلی۔ بیو مونٹ107 رنز بناکر آؤٹ ہوئیں۔ دونوں کرکٹرز کے درمیان 188 رنز کی شراکت قائم ہوئی۔ مہمان ٹیم کی کپتان ہیتھر نائٹ نے 41 رنز کی اننگز کھیلی۔ پاکستان کی جانب سے پہلا میچ کھیلنے والی اسپنر رامین شمیم نے 3 وکٹیں حاصل کیں۔ 285 رنز کے تعاقب میں پاکستانی ٹیم کا آغاز متاثر کن نہ رہا اور محض 39 کے مجموعی اسکور پر اس کی تین کھلاڑی آؤٹ ہوکر پویلین واپس لوٹ گئیں۔ چوتھی وکٹ کے لیے بسمعہ معروف اور عمیمہ سہیل کے درمیان 67 رنز کی شراکت قائم ہوئی تاہم کپتان بسمعہ معروف 69 اور عمیمہ سہیل 29 رنز بناکر آؤٹ ہوگئیں۔دونوں کھلاڑیوں کے آؤٹ ہونے کے بعد پاکستان ویمنز کرکٹ ٹیم کی بیٹنگ لائن اپ ایک بار پھر دباؤ کا شکار ہوگئی اور پوری ٹیم 45ویں اوور میں 209 رنز بناکر آؤٹ ہوگئی۔ مہمان ٹیم کی جانب سے کیٹ کراس نے 4 وکٹیں حاصل کیں۔
