نئی دہلی : ساہتیہ اکیڈیمی ایوارڈ 2022کا اعلان کر دیا گیا ہے۔ اس سال اردو زبان کے لیے مشہور ادیب پروفیسر انیس اشفاق کا انتخاب کیا گیا ہے جبکہ ہندی میں خصوصی تعاون کے لیے مشہور ہندی شاعر بدری نارائن کو ساہتیہ اکیڈیمی ایوارڈ دینے کا فیصلہ کیا گیا ہے۔ معروف ناول نگار پروفیسر انیس اشفاق کو ان کے ناول ‘خواب سراب’ کے لیے یہ پروقار ایوارڈ دینے کا اعلان کیا گیا ہے۔ساہتیہ اکیڈیمی کے سکریٹری شرینواس راؤنے ایوارڈ کا اعلان کرتے ہوئے بتایا کہ اردو، ہندی اور انگریزی سمیت مجموعی طور پر 23 زبانوں کے لیے ایوارڈ کا اعلان کیا گیا ہے۔ ان میں سات شاعری کے مجموعہ، چھ ناول، دو افسانوی مجموعہ، دو ادبی تنقید، تین ڈرامہ اور ایک خود نوشت سمیت کچھ دیگر تصنیفات شامل ہیں۔1955 سے ساہتیہ اکیڈیمی ایوارڈ ادبی شعبہ میں ملک کا سب سے باوقار اعزاز ہے۔ ساہتیہ اکیڈیمی ایوارڈ یافتگان کو ایک لاکھ روپے نقد رقم اور ایک مومنٹو پیش کیا جاتا ہے۔
