ممبئی: مغل بادشاہ اورنگ زیب کا مقبرہ مہاراشٹرا میں ایک بڑے سیاسی تنازعہ کا مرکز بن گیا ہے ۔ دائیں بازو کی تنظیموں، بی جے پی رہنماؤں اور چھترپتی شیواجی مہاراج و ان کے بیٹے چھترپتی سنبھاجی مہاراج کی اولاد نے مقبرے کو مسمار کرنے کا مطالبہ کیا ہے ۔اورنگ زیب کی قبر خلد آباد میں حضرت زین الدین چشتیؒ کے مزار کے احاطے میں واقع ہے اور یہ محکمہ آثار قدیمہ کے کنٹرول میں آتی ہے ۔دائیں بازو کی تنظیم ہندو جن جاگرتی سمیتی نے حکومت سے مطالبہ کیا ہے کہ وہ اورنگ زیب کے مقبرے کی دیکھ بھال کیلئے مالی امداد بند کرے ۔ ایچ جے ایس کے ریاستی کوآرڈینیٹر سنیل گھنوت کے مطابق کہ اے ایس آئی ہر سال اورنگ زیب کے مقبرے کی دیکھ بھال پر لاکھوں روپے خرچ کرتا ہے جبکہ سندھو درگ قلعہ میں واقع چھترپتی شیواجی مہاراج کے مندر کو حکومتی امداد کے طور پر صرف 250 روپے ماہانہ ملتے ہیں۔ یہ شدید تفاوت ناقابل قبول ہے ۔
