لاہور: پاکستان کے اولمپک گولڈ میڈلسٹ ارشد ندیم کے اعزاز میں گورنر ہاؤس لاہور میں پُروقار استقبالیہ کا اہتمام کیا گیا جس میں گورنر پنجاب سردار سلیم حیدر نے جویلین تھرو کے اسٹار کو قیمتی انعامات اور تحائف پیش کئے۔ ندیم کا گورنر ہاؤس پہنچنے پر سرخ قالین بچھا کر شاندار استقبال کیا گیا۔ اس موقع پر گھڑ ڈانس اور ڈھول کی تھاپ پر رقص بھی کیا گیا۔ تقریب کے دوران نیشنل ہیرو کو پلاٹ، گاڑی اور انعامی رقم سے نوازا گیا جبکہ ارشد ندیم نے عزم ظاہر کیا کہ وہ آئندہ بھی اپنی کارکردگی سے ملک کا نام روشن کرتے رہیں گے۔ انہوں نے کہا کہ آنے والے وقت میں بھی بھرپور محنت کروں گا۔ گورنر پنجاب نے امید ظاہر کی کہ اولمپک ریکارڈ کے بعد ارشد ندیم اب ورلڈ ریکارڈ بھی بنائیں گے۔ اس موقع پر اسٹار اتھلیٹ کے کوچ سلمان اقبال بٹ کیلئے بھی انعامی چیک دیا گیا۔ بعد ازاں لاہور ایمرجنسی سرویسز اکیڈمی ریسکیو 1122 میں بیسک کورس 44 کی پاسنگ آوٹ پریڈ منعقد ہوئی جس میں مہمان خصوصی گولڈ میڈلسٹ ارشد ندیم اور اسپیکر پنجاب اسمبلی ملک احمد اور وزیرصحت خواجہ سلمان رفیق موجود رہے۔ ندیم نے کہا کہ اسپیکرپنجاب اسمبلی کاشکریہ اداکرتاہوں، پاکستان کیلئے میڈل جیتنے کی خواہش تھی، اور پوری دنیا میں پاکستان کا نام روشن ہوا۔
