لکھنؤ: اتر پردیش اسپیشل ٹاسک فورس نے الہ آباد پولیس کے ساتھ مشترکہ آپریشن کے دوران امیش پال قتل معاملہ کے سلسلے میں عتیق احمد کے بہنوئی اخلاق احمد کو میرٹھ سے گرفتار کیا ہے۔ پولیس کے مطابق اخلاق احمد نے 2005 میں بی ایس پی کے رکن اسمبلی رہے راجو پال کے قتل کے اہم گواہ اومیش پال کے شوٹروں کی مالی اعانت کرنے میں اہم کردار ادا کیا تھا۔ پولیس اس سے پہلے اخلاق احمد سے اومیش پال قتل کیس میں کئی بار پوچھ تاچھ کر چکی ہے۔یاد رہے کہ اومیش پال کو 24 فروری کو اتر پردیش کے الہ آباد یعنی پریاگ راج میں گولی مار کر ہلاک کر دیا گیا تھا۔ عتیق احمد 2005 میں بی ایس رکن اسمبلی راجو پال کے قتل معاملہ میں اہم ملزم ہے اور اس پر راجو پال کے قتل کے اہم گواہ اومیش پال کے قتل کا بھی الزام ہے۔ایم پی ایم ایل اے عدالت نے مافیا سے سیاستداں بنے عتیق احمد اور دیگر دو کو اومیش پال اغوا کیس میں مجرم قرار دیتے ہوئے عمر قید کی سزا سنائی ہے۔
