وڈوڈرا میں ایک این آر آئی خاتون سمیت 3 کیسز کی تصدیق،ائیر پورٹس پر ہائی الرٹ
نئی دہلی : چین میں کورونا نے ایک بار پھر تباہی جیسے حالات پیدا کردیئے ہیں۔ لگاتار بڑھ رہے کیسز کیلئے اومیکرون کے سَب۔ویریئنٹ ’بی ایف 7‘ کو ذمہ دار ٹھہرایا جا رہا ہے۔ تشویشناک بات یہ ہے کہ اس سَب ویریئنٹ کی ہندوستان میں بھی دستک ہو چکی ہے۔ یہ اطلاع سرکاری ذرائع نے چہارشنبہ کے روز دی۔ عہدیداروں نے بتایا کہ گجرات بائیو ٹیکنالوجی ریسرچ سنٹر نے ہندوستان میں بی ایف 7 کے پہلے معاملے کا پتہ لگایا تھا اور اب تک گجرات سے دو معاملے سامنے آ چکے ہیں۔ علاوہ ازیں ایک معاملہ اوڈیشہ سے بھی سامنے آیا ہے۔بتا یا گیا ہے کہ گجرات کے وڈوڈرا میں ایک این آر آئی خاتون اس سے متاثر ہوئی ہے ۔ اوڈیشہ میں بھی اس کے ایک مریض کی تصدیق ہوئی ہے ۔ اس خاتون اور دیگر تین افراد کو آئسولیشن میں رکھا گیا ہے۔ تمام ائیر پورٹس پر ہائی الرٹ کردیا گیا ہے جبکہ بیرونی مسافرین کا اسکریننگ ٹسٹ کرنے کی ہدایت دی گئی ہے ۔اومیکرون کے سَب۔ویریئنٹ ’بی ایف 7‘ کی ہندوستان میں دستک کے بعد تشویش میں اضافہ ہونا لازمی ہے۔ چین میں چونکہ حالات کافی بگڑ گئے ہیں، اس لیے ہندوستان میں ابھی سے احتیاطی اقدام کی تیاریاں بھی شروع ہو چکی ہیں۔ آج ہی مرکزی وزیر صحت منسکھ منڈاویا کی صدارت میں کووڈ ریویو میٹنگ یعنی کورونا کے پھیلاو کو روکنے کیلئے مختلف امور کا جائزہ لیا گیا اور عوام کو بھی مختلف ہدایات بھی دی گئی ہیں لیکن پابندی سے متعلق کوئی بڑا اعلان نہیں ہوا ہے۔ وزیر صحت نے یہ ضرور کہا ہے کہ لوگوں کو بہت احتیاط کرنے کی ضرورت ہے اور ماسک کا استعمال بھی یقینی بنایا جائے۔ انھوں نے کہا کہ موجودہ اور آئندہ کے حالات پر مستقل نگرانی رکھنے کی ضرورت ہے اور کسی بھی حالات کا سامنا کرنے کے لیے حکومت تیار ہے۔بہرحال، ذرائع کا کہنا ہے کہ چین کے مختلف شہر ابھی کووڈ کے سب سے زیادہ متعدی ویریئنٹ اومیکرون، بیشتر بی ایف 7، کی زد میں ہیں جو بیجنگ میں پھیلنے والا سب سے اہم ویریئنٹ ہے۔ اسی کی وجہ سے چین میں کووڈ انفیکشن کے معاملوں میں زبردست اضافہ دیکھنے کو مل رہا ہے۔ بی ایف 7 دراصل اومیکرون کے ویریئنٹ بی اے 5 کا سَب ویریئنٹ ہے اور اس میں انفیکشن کی وسیع صلاحیت ہوتی ہے اور اس کی انکیوبیشن مدت کم ہوتی، اور اس میں دوبارہ انفیکشن پیدا کرنے یا ان لوگوں کو بھی متاثر کرنے کی زبردست صلاحیت ہوتی ہے جنھیں ٹیکہ لگایا جا چکا ہے۔ یہ امریکہ، برطانیہ ‘ بلجیم، جرمنی، فرانس اور ڈنمارک جیسے یورپی ممالک سمیت کئی دیگر ممالک میں پہلے ہی پایا جا چکا ہے۔اس درمیان چین میں کورونا وائرس کے بڑھتے معاملوں کو دیکھتے ہوئے حکومت ہند ایکشن موڈ میں آ گئی ہے۔ وزارت صحت نے چین سے آنے والوں کی ایئرپورٹ پر جانچ کرنے کو کہا ہے۔ اب چین سے آنے والے لوگوں کی جانچ کی جائے گی۔ وزارت نے افسران کو اس سے جڑی گائیڈلائنس جاری کر دی ہیں۔ وزارت صحت کے ذرائع نے بتایا ہے کہ ملک میں ابھی 10 الگ الگ کورونا کے ویریئنٹ ہیں، اس میں سب سے تازہ ویریئنٹ بی ایف 7 ہے۔ اسی کے ساتھ ملک میں کہیں کہیں ڈیلٹا ویریئنٹ بھی دیکھنے کو مل رہا ہے۔